کوردستان

بە پێی هەواڵی گەیشتوو، رۆژی پێنجشەممە 24ی رەزبەر، پتر لە 100 كەس لە خەڵكی بوومەلەرزە لێدراوی شاری “مورموری” سەر بە پارێزگای ئیلام لە ناڕەزایی بە نەبوونی خزمەتگوزاری و یارمەتی سەرەتاییی، لە بەرانبەر بەخشداریی ئەو پارێزگایە كۆبوونەوەیەكی ناڕەزایی دەربڕینیان بەڕێوە برد.

لە شاری مەریوان، گەورەترین پاركی جیهان بۆ نمایشكردنی شانۆی سەر شەقام كرایەوە و سەدان كەس لەو رێوڕەسمەدا بەشدارییان كرد.

مەسعود شەمس نژاد یەكێك لە پارێزەرە ناسراوەكان بە تۆمەتی پڕوپاگەندە دژی كۆماری ئیسلامی بە 4 مانگ زیندان مەحكوم كراوە، كە ئەمڕۆ بە مەبەستی جێبەجێ كردنی حوكمەكەی خۆی بە زیندانی شاری ورمێ ناساند.

دوو چالاكی فەرهەنگی ـ خوێندكاریی كورد كە ماوەی١٠ رۆژ لەمەوبەر لە خۆپیشاندانەكانی پشتیوانی خەڵكی شاری تاران بۆ كۆبانێ دەستگیر كراون، چارەنووسیان نادیارە.

بە پێی ئەو هەواڵانەی بە زاگرۆس پۆست گەیشتووە، ژمارەیەك لە چالاكانی كرێكاریی شاری سنە وێڕای گەشتێك بۆ شاری پاوە، لە نزیك ئەو شارە و لە بەردەم غاری قوڕیە قەڵا بە هەڵگردنی پلاكاردێك پشتیوانی خۆیان بۆ خەڵكی خۆڕاگری كۆبانی دەربڕیوە.

وەزیری بەرگریی ئیتالیا رایگەیاند ژمارەیەك چەك‌و تەقەمەنی‌و فرۆكەی بێ فرۆكەوان، لەگەڵ 280 هێزی سەبازیی ئەو وڵاتە بۆ راهێنانی هێزی پێشمەرگە رەوانەی باشووری كوردستان دەكات.

یەكێك لە سەركردە دڕندە و سەربڕەكانی داعش لە كۆبانێ بە دەستی شەڕڤانەكانی یەپەگە كوژراو وێنەكانیش لە پەیجەكانی داعش بلاو كراوەتەوە.

ژمارەیەك لە ئەندامی پارتی سۆسیال دیمۆكرات SDP لە ئانكارا پایتەختی وڵاتی توركیە بە دروشمی “كۆبانێ سەردەكەوێ” چوونە نێو دەفتەری كەناڵی ئەلجەزیرە توركی لە ئانكارا و پلاكاردێكیان لە پەنجەرەی بیناكە هەڵواسی و پشتیوانی خۆیان بۆ كۆبانێ دووپات كردەوە.

116 پارێزەری دادگاكانی شاری كرماشان بە نووسینی نامەیەك بۆ بان‌كی مون سكرتێری گشتی رێكخراوی نەتەوەیەكگرتووەكان، وێڕای شی كردنەوەی دۆخی ئێستای كورد و بەرەنگاری ئەم گەلە لەگەڵ چەكدارانی داعش و رەخنەی توند لە هەڵوێست و كردەوەكانی ئەو رێكخراوەیە، خوازیاری ئاوڕدانەوەی جیدی و بەرپرسانە سەبارەت بە بڕیاردان لە سەر چارەنووسی خەڵكی كوردستان بوون.

لە ساڵی ١٣٦٧ی هەتاوە تا ساڵی ١٣٩١ لە پارێزگاكانی ورمێ، ئیلام، كرماشان، سنە و خووزستان دوو هەزار و ٤٣٣ هاووڵاتیی مەدەنیی بە هۆی كەرەسەی بەجێماوی جەنگی و تەقینەوەی مین گیانیان لەدەستداوە و پێنج هەزار و ٦٠١ كەسی دیكەش بریندار بوونە.

وتەبێژی وەزارەتی دەرەوەی ئەمریكا، ڕایگەیاند: سەرەتای ئەم هەفتەیە بەرپرسێكی وەزارەتی دەرەوە دانوستانی ڕاستەوخۆی لەگەڵ شاندێكی پارتە سەرەكیەكەی كوردی سوریە(پەیەدە) ئەنجامداوە. ئەوەش لەكاتێكدایە كە ئەمریكا سەرقاڵی دروستكردنی هاوپەیمانێتییەكە لە دژی داعش لە ناوچەكەدا.

لە ماوەی چەند هەفتەی رابردوودا بە شێوەیەكی بەرچاو ڤیرووسی ئانفۆڵانزا لە نێو زیندانی ناوەندیی شاری ورمێ پەرەی سەندووە و بێهداری نێو زیندانیش بە شێوەی هەڵە دەرمان دەداتە زیندانیە نەخۆشەكان و ئەمەش كێشەكەی قووڵتر كردووەتەوە.

سەرلەبەیانیی رۆژی چوارشەممە ٢٣ی رەزبەر زیندانیەكی بەساڵاچووی بە ناوی “بەهمەن حسێنی” خەڵكی گوندی “گۆڵگنی”  شاری ورمێ، لە زیندانی ناوەندیی شاری سنە لەسێدارە درا.

سێ ئەندامی دەستەیەكی ماتۆڕسواری هۆلەندی دەبنە پێشمەرگە لەدژی داعش، دەسەڵاتدارانی هۆلنەدیش هیچ كێشەیەكیان نییە لەسەر بوونیان بە پێشمەرگە.

لە ئەنجامی پێكدادانی شەرڤانانی یەپەگە و چەكدارانی داعش لە كۆبانێ و كوژرانی چەكدارێكی زۆر لەبەرەی داعش، بوونی لاشەی كوژراوانی داعش گوندنشینانی سەر سنوری هەراسان كردووە.

بە پێی راپۆرتی هەواڵنێریی حكومەتی ئیلنا، كرێكارێكی تەمەن ٣٢ ساڵەی خەڵكی شاری سەقز لەكاتی خاوێن كردنەوەی دەزگای “پیكسێل”‌ی كارگەیەكی بەرهەمهێناندا، تووشی بەرق گرتوویی بوو و بەو بۆنەوە گیانی لەدەستدا.