فەرهاد پیرباڵ لە بابەت گیراوە رۆژهەڵاتیەكان هەڕەشە لە وەزیری ناوخۆ دەكات

رۆژی 2013|11|08 خۆپیشاندانێك لە بەردەم پاركی شانەدەر لە شاری هەولێر، بۆ مەحكوومكردنی ئێعدامكردنی لاوانی كورد لە رۆژهەڵاتی كوردستان بەڕێوەچوو، كە دواتر‌و پاش كۆتایی خۆپیشاندانەكە بە هۆی هێرشی چەند كەسی خۆپیشاندەر بۆ سەر كونسولگەری ئێران لە هەولێر، هەشت چالاكی سیاسی كوردی رۆژهەڵات بە بڕیاری وەزیری ناوخۆی هەرێمی كوردستان دەسبەسەركران كە تا ئێستاش چارەنووسیان نادیار. هاوكات بە پێی نووسراوەیەك كە فەرهاد پیرباڵ نووسەرو مێژووناسی كورد لەسەر لاپەڕەی فەیسبووكەكەی دایناوە، هەڕەشەی ئەوەی لە كەریم سنجاری وەزیری ناوخۆی هەرێمی كوردستان كردووە كە دەبێ لە ماوەی 23 كاتژمێر ئەو گیراوانە ئازاد بكات. ناوبراو هەڕەشەی ئەوەیكردووە ئەگەر بێتوو تا 23 كاتژمێری دیكە ئەو هەشت گیراوە سیاسیە كوردەی رۆژهەڵات ئازاد نەكرێت گەورەترین خۆپیشاندان لە هەولێر‌و سلێمانیی وەڕێدەخات.