دوو شه‌ممه‌ 10 كانونی یه‌كه‌م 2018
ماڵەوە / کوردستان / بانگه‌وازی ڕێکخراوه‌ مه‌ده‌نییه‌کانی مه‌ریوان بۆ یارمه‌تیی کوردانی شنگال

بانگه‌وازی ڕێکخراوه‌ مه‌ده‌نییه‌کانی مه‌ریوان بۆ یارمه‌تیی کوردانی شنگال

‘هیچ کاره‌ساتێک گه‌وره‌تر له‌ شه‌ڕ و ئاواره‌ و برسیکردنی ئینسانه‌کان نییه‌!’ ئه‌وه سه‌ردێڕی بانگه‌وازێکه که تێیدا دوانزه رێکخراوی مه‌ده‌نیی مه‌ریوان داوان له خه‌ڵکی ئه‌و شاره کردووه به هانای لێقه‌وماوانی شنگال‌ه‌وه بچن.

دوانزه رێکخراو له رێکخراوه مه‌ده‌نییه‌کانی مه‌ریوان بڕیاریاند داوه پێکه‌وه‌و به هاوئاهه‌نگیی یه‌کتر یارمه‌تییه‌ مادییه‌کانی خه‌ڵکی ئه‌و شاره کۆبکه‌نه‌وه‌و بیگه‌یه‌ننه ده‌ست لێقه‌وماوانی شنگال که له شارو ماڵ‌ی خۆیان وه‌ده‌ر نراون‌و زۆربه‌یان له بارودۆخێکی نزیک لێواری مه‌رگ ئه‌ژین.

ده‌قی بانگه‌وازه‌که:

هیچ کاره‌ساتێک گه‌وره‌تر له‌ شه‌ڕ و ئاواره‌ و برسیکردنی ئینسانه‌کان نییه‌!

ئاشتیخوازان، مرۆڤدۆستان و پارێزەرانی ژیان و مرۆڤایه‌تی!

جارێکی تر دێوه‌زمه‌ی شه‌ڕ و برسیه‌تی و لێقه‌ومان له‌ گۆشه‌یه‌کی تری ئه‌م جیهانه‌ پڕکێشه‌یه‌دا‌، به‌رۆکی ژیان و مرۆڤایه‌تیی سه‌رده‌می گرته‌وه‌. مه‌رگه‌سات و تینوویه‌تی و برسیه‌تی و ده‌ستدرێژی بۆ سه‌ر نامووس و که‌رامه‌تی مرۆڤ، هاوارو گریانی ژن و منداڵ و پیر و په‌ککه‌وته‌ی “شنگال”ی کوردستانی گه‌یانده‌ ئاسمان… ئێمه‌ چ ئاسان ڕاهاتووین تا کپ و بێده‌نگ، گوێ له‌ دوایین هاوار و گریانی ئه‌و لێقه‌وماوانه‌ بگرین!

به‌ڵام… هاواری ئاشتیخوازی و نه‌فره‌ت له‌ شه‌ڕ و برسیه‌تی و ئاواره‌یی، ئه‌مڕۆ به‌رزتر له‌ هه‌موو کاتێک، ده‌نگ هه‌ڵده‌بڕێ و ده‌بێته‌ کۆده‌نگییه‌ک له‌ یه‌کیه‌تی و هاودڵی و یارمه‌تیی هه‌مه‌لایه‌نه بۆ ساڕێژکردنی به‌شێک له‌ زامی ئاواره‌ و لێقه‌وماوانی شنگال. ئێمه‌ وه‌ک ڕێکخراوه‌ مه‌ده‌نییه‌کانی مه‌ریوان له‌ سه‌ر ئه‌رکی ئینسانیی خۆمان به‌ پێویستی ده‌زانین هاوکات و هاوده‌نگ له‌گه‌ڵ مرۆڤدۆستان و ئاشتیخوازانی جیهان، به‌ هاوکاریی مانگی سووری مه‌ریوان، له‌ کۆکردنه‌وه‌ی یارمه‌تی بۆ ئاواره‌کانی شنگال یاریده‌ده‌ر بین و له‌م هه‌نگاوه‌ پیرۆزه‌شدا، چاوه‌ڕوانی هاوکاری و یارمه‌تییه‌کانی ئێوه‌ی ئازیزین.

شوێنی کۆ کردنه‌وه‌ی یارمه‌تی:

  • مه‌ریوان، مه‌یدانی باوه‌ڕه‌شی
  • مه‌ریوان، مه‌یدانی شه‌بڕه‌نگ
  • مه‌ریوان، مه‌یدانی سه‌رباز

ڕێکخراوه‌ مه‌ده‌نییه‌کانی مه‌ریوان – گه‌لاوێژی 1393:

1-ئه‌نجومه‌نی سه‌وزی چیـا 2 – ناوه‌ندی فه‌رهه‌نگـی- هونه‌ریی ڤــه‌ژین 3- ناوه‌ندی زانستی -فه‌رهه‌نگیی ڕۆنـان

4- ئه‌نجومه‌نی فه‌رهه‌نگی- ئه‌ده‌بیی مه‌ریوان 5- ئه‌نجومه‌نی نمایشی مه‌ریوان 6- ئه‌نجومه‌نی مووسیقای مه‌ریوان 7- ئه‌نجومه‌نی پێشگیری له‌ ئێعتیادی مه‌ریوان 8- ئه‌نجومه‌نی ئه‌ده‌بیی نێ 9- ناوه‌ندی فیلم و وێنه‌ی ئاسۆ 10- ئه‌نجومه‌نی خۆشنووسانی مه‌ریوان 11- ئه‌نجومه‌نی هونه‌ره‌ ته‌جه‌سومییه‌کان 12- ناوه‌ندی سڵامه‌تی ژین

بابەتی هاوپۆل

رۆحانی؛پێم وانەبێ وڵاتێکی دیکە وەکوو ئێران لە بواری ئازادیەوە بوونی هەبێت

رۆژی چوار شەممە ١٤ ی سەماوەز دوو رۆژ بەر لە ١٦ ی سەرماوەز(١٦ اذر) “رۆژی …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

This site uses Akismet to reduce spam. Learn how your comment data is processed.