پێنج شه‌ممه‌ 24 كانونی دووه‌م 2019
ماڵەوە / بابەتەکان / مەزهەب و سەرمایەداری، دوانەی دایکێکن/ فیروز مامۆیی

مەزهەب و سەرمایەداری، دوانەی دایکێکن/ فیروز مامۆیی

هێزە زل و زەبەلاحەکانی جیهان هەمیشە بۆ مانەوەی خۆیان و چەسپاندن و درێژەدان بە پیلان و ستراتیژیە پاوانخواز و بەرژەوەندیخوازانەکانیان و مۆر و مۆم کردنی ئامانجەکانیان و وەرگرتنی متمانە بۆ پارێزراو بوونی پێگەیان لە ئاستی جیهاندا و درێژەدان بە سیاسەتە نگەتیڤەکان، پشتیوانی لە هێز و دەسەڵات و ئایدئولۆژیە دواکەوتووەکان و ئەو تاقم و گرووپانە دەکەن کە بەرژەوەندیەکانیان دەپارێزن و بۆ ئەو مەبەستەش هانا دەبەنە بەر هەموو کردەوەیەکی نەشیاو و دڕندانە و سەدە ناوەڕاستی.

بە درێژایی چەند سەدەی رابردوو و بەتایبەت پاش هەنگاونان بەرەو هەزارەی سێهەمی زایینی، سیستەمی سەرمایەداریی جیهانی بە پاڵپشتی هاوپەیمانەکانی و لە لایەکی دیکەوە پێکهێنەران و هاوڕێیانی جەمسەی رۆژهەڵاتی کۆن، بۆ بەربەرەکانێ لەگەڵ رۆژئاواییەکان و لە درێژەی هەمان سیاسەتی شەڕی سارددا دەست دەدەنە ئاژاوەگێریی و دروستکردن و پاڵپشتی کردنی هێزە دواکەوتووەکان لە ناوچە جیاجیاکانی جیهان و لە هەموو شوێنێ زیاتر لە ناوچەی رۆژهەڵاتی ناوەڕاستدا. بەو پێیە ئەو دوو بەرە ملهوڕ و زڵهێزاە کە هەموو پشکە ئابووریی، سیاسی و دیپلۆماتیک و… هتدەکانی جیهانیان لە ژێر سەیتەرەی خۆیاندا قۆرخ کردووە، بۆ ئەوەیکە شەڕەکانیان بگوازنەوە بۆ دەرەوەی سنوورەکانی خۆیان، زۆر جار خەڵکی بێ تاوان و بێ دەرەتانی وڵاتانی دواکەوتوو دەکەنە بەر پەڵ و قوربانیی سیاسەتە نەشیواوەکانی خۆیان.

بۆ هەمووان روون و ئاشکرایە کە سیستەمی سەرمایەداریی بۆ ئەوەیکە بتوانێت بەرژەوەندییەکانی خۆی لە ئاستی جیهانیدا بپارێزێت و ئاسۆیەک بۆ رەچاو کردنی ئەو بەرژەوەندییانە ببینێتەوە، بەردەوام پەنای بردووەتە بەر دواکەوتوو و حەجەری ترین هێزەکان. بۆ ئەم مەبەستەش ئیسلامی سیاسی بە هەموو لق و پۆپەکانیەوە باشترین و گونجاوترین هەلی لەبار و رەخساو بۆ پێکان و پێشەوەچوونی ئامانجەکان ئەو سیستمەیە.

بەهێز بوون و پەرەسەندنی هێزە بناژۆخواز و پاشکەوتووەکان لە ماوەی چەند دەیەی رابردوودا لە سەرانسەر جیهان و بەتایبەت لە رۆژهەڵاتی ناوەڕاست و لەوەش تایبەتیتر لە دەوروبەری وڵاتانێکدا کە مەجال و بەستێنی پێشوازی کردن لە دێمۆکراسی و پێشکەوتنیان تێدایە و سەردەمانێک بەهێزترین لانکە و نوێنگەی هێزە چەپ و پێشکەوتنخوازەکان بوون، هەمووی لە رێڕەوی بەرژەوەندییەکانی رۆژئاوا و لە سەرەوەی هەموویانەوە ئەمریکادایە. بۆیە رۆژئاوا بۆ درێژەدان و بەردەوامی لەسەر ئەو رەوتە قێزەونە پێویستیان بەوەیە کە هێز و هزرگەلێکی دواکەوتوو لە ژێر سێبەری رەشی ئیسلامی سیاسی لە ناوچەکەدا درێژە بە حەیاتی خۆیان بدەن و لە حەسارێکی پارێزراو و لە ژێر چەپۆک و چاودێریی ئەواندا جەولە بکەن و هەم لەو رێگایەوە چەک و چۆڵ و باقی بەرهەمە سەرمایەدارییەکانی خۆیان بفرۆشن و هەمیش بەرژەوەندییەکانیان پارێزراو دەمێنێتەوە.

لە لایەکی دیکەوە گرووپە توندئاژۆە مەزهەبیەکانیش بۆ مانەوەی خۆیان و درێژەدان بە سیاسەتە چەقبەستووە پڕاوپر لە تێرۆر و ترس و تۆقاندنەکانیان هەمیشە بە زلهێزانی رۆژئاواییەوە خۆیان هەڵدەواسن و لە سەر پەیژەی پیلانەکان و ئاڵترناتیڤەکانی ئەوان خۆیان تەیار دەکەن.

ئەم هۆکارانە و دەیان و سەدان هۆکاری دژە مرۆیی و پاوانخوازانەی سیستەمی سەرمایەداری و رەوتی دواکەوتووی ئایینی دەرخەری ئەو راستیەن کە هەم سەرمایەداران و هەم مەزهەبیەکانی جیهان هەردوو ئاوەڵدوانە و بەرسکی یەک دایکن و لە نێو یەک منداڵداندا لە دایک بوون و پێکەوە گەورە دەبن و بە واتایەکی دیکە تەواوکەری یەکترن و بە لەنێوچوون و سەقەت بوونی یەکێیان ئەوی تریش بەرەوڕووی هەڵدێر و نەمان دەبێتەوە و مەترسی ئەوەی دەکەوێتە سەر کە بە نەمانی برا دوانەکەی ئەویش جەولانگە و گۆڕەپانی مانۆڕدانی بەرتەسک دەبێتەوە و ناتوانێت بە ئاستی پێویست بەرژەوەندیی و قازانجەکانی دابین بکات.

لە نیهایەتدا بەو ئاکامە دەگەین کە تا سەردەمانێ کە سیستەمی خوێنمژ و ئۆپۆرتۆنیستی سەرمایەداریی بوونی هەبێ، کۆمەڵگای مرۆڤایەتی پێشکەوتنی عەقڵانی تۆکمە و گونجاو بە خۆیەوە نابینێت و هەردەم سێبەری رەشی تێرۆر، ترس و تۆقاندن لە سەر کۆمەڵگای مرۆڤایەتیدا قورسایی دەکات و بوونی ئەو سێبەرە رەش و تۆقێنەرە، پارێزەری دواکەوتووی و چەقبەستوویی ئایدئۆلۆژیا و بیرە تەسک و تاریکەکانە. ئەمەش لەخۆیدا دەرخەری ئەو راستیەیە کە بەشێکی زۆر لە خەبات و تێکۆشانی مرۆڤ بۆ رزگار بوون لە تاقم و گرووپ و دەستە تێرۆریستیە مەزهەبی و ئایینیەکان، بەستراەوەتەوە بە لاواز کردن و بەزاندنی سیستەمی سەرمایەداریی جیهانیەوە کە بۆ مەبەستەکانی خۆی دەستی نگریسی ئاوەڵدوانەکەی تا سەرەمەرگ بەر نادات و بۆ پاراستن و مانەوەی خۆی، بە چنگ و ددانەوە هزر و بیرۆکە دواکەوتوو و دژە مرۆییەکان دەپارێزیت.

بابەتی هاوپۆل

زوال “کهنه” درحالیکه ” جدید” هنوز “تولد” نیافته است

“پرفسور ولفگنگ استریک”

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

This site uses Akismet to reduce spam. Learn how your comment data is processed.