زاگرۆس پۆست
نوێنه‌ری شاره‌کانی سنه‌و دیوانده‌ره‌و کامیاران له په‌رله‌مانی ئێران رایگه‌یاندووه بێکاری له پارێزگای سنه‌دا گه‌یشتووه‌ته زیاتر له 25له‌سه‌دو لاوانی ئه‌م پارێزگایه‌ش ناچارن بۆ بژێویان رووبکه‌نه سه‌ر سنووره‌کان.ئه‌حسه‌ن عه‌له‌وی له په‌رله‌مانی ئێران له وتارێکیدا روو له وه‌زیری ناوخۆ رایگه‌یاند بارودۆخی هه‌لی کار نائاساییه‌و بێکاری له پارێزگای سنه‌دا له‌سه‌ر سه‌دا 25ه. ناوبراو ئاماژه‌شی به ناڕوون بوونی ‘شمه‌کی قاچاخ’ کردووه که بووه‌ته هۆی ئاڵۆزتر بوونی گوزه‌رانی خه‌ڵک.
حه‌فته‌ی رابردووش ناوه‌ندی ئاماری ئێران رایگه‌یاندبوو که پارێزگای سنه له بێکاریدا دوای پارێزگای لوڕنشینی خوڕه‌ماباد پله‌ی دووه‌می هه‌یه. هه‌ریه‌که له پارێزگاکانی ئیلام‌و کرماشانیش له داهێنانی هه‌لی کاردا له دواکه‌وتووترین پارێزگاکانن له سه‌ر ئاستی ئێران.
