رێژەی نەخوێندەواری لە ئێران سەرسووڕهێنەرە

بە پێی ئامارێك كە لە لایەن دەزگاكانی كۆماری ئیسلامی بڵاو بوەتەوە، رێژەی 9 ملیۆن‌و 700 هەزار كەس لە ئێران هیچ خوێندەواریەكیان نیە.

محەمەد مێهدی زادە جێگری رێكخراوی نێهزەتی خوێندەواری ئێران دانی بەوەدا نا، لەو رێژەیە 3 ملیۆن‌و 450 هەزار كەسیان لە خوار تەمەنی 50 ساڵدان‌و ئەمەش كارەساتێكی گەورەیە.

ناوبراو لە درێژەدا ئاماژەی بەوەدا، ئەگەر لە وڵاتێكدا عەداڵەتی كۆمەڵایەتی‌و بواری بارهێنان دابین نەكرێت، هیچكات بە عەداڵەتی ئابووریش ناگەین‌و وڵات بەردەوام لە دواكەوتوویی دەمێنێتەوە.

ئەمە لە حاڵێكدایە كە هەر بە پێی ئامارەكانی كۆماری ئیسلامی، ساڵانە رێژەیەكی بەرچاو لە قوتابیان لە ئێران واز لە خوێندن دەهێنن‌و تا ئێستا دەوڵەت هیچ هەوڵێكی بۆ چارەسەری ئەم گرفتە نەكردووە‌و بەمجۆرەش رێژەی نەخوێندەواران لە ئێران رووی لە زیادبوون كردووە.