زاگرۆس پۆست
له‌گه‌ڵ داوای به‌ڕێوه‌بردنی رێوڕهسمی نه‌ورۆز له لایه‌ن چالاکانی شاری سه‌رده‌شته‌وه، شۆرای ته‌ئمینی ئه‌و شاره داواکه‌ی ره‌دکردووه‌ته‌وه.
سه‌رچاوه‌یه‌کی چالاک له سه‌رده‌شت رای گه‌یاندووه هۆکاری ئه‌و ره‌دکردنه‌وه‌یه لای ئه‌وان نادیاره‌و نازانن بۆ ره‌دکراوه‌ته‌وه. رێوڕهسمی ساڵانه‌ی نه‌ورۆز تا ئێسته به شێوه‌ی نافه‌رمی‌و خه‌ڵکی له مه‌یدانی نه‌ورۆزی سه‌رده‌شت به‌ڕێوه چووه، جگه له مه‌یدانی سه‌رده‌شت، پارکی کوده‌ک شوێنێکی تره که له ئه‌گه‌ری رێگه‌پێدراوبوونی رێوڕه‌سمه‌که وه‌ک شوێنی به‌ڕێوه‌بردنی نه‌ورۆز پێشنیار کراوه.
شۆرای ته‌ئمین له هه‌موو شارێکی ئێران بوونی هه‌یه‌و له لایه‌ن فه‌رمانداریی شاره‌کانه‌وه چاودێری ده‌کرێت‌و پێک هاتووه له: فه‌رماندار، شاره‌دار، فه‌رمانده‌ی سپای پاسداران، فه‌رمانده‌ی نیرو ئینتزامی‌و به‌رپرسی ئیتلاعات. شۆرای ته‌ئمین بڕیاره چاره‌نووسسازه‌کان له سه‌ر بارودۆخی ئه‌منییه‌تیی شاره‌کان ده‌رده‌کات.
