لەسەر زنجیرە چیاكانی”چلچەمە” یادی شاخەوانێكی كورد بەرز راگیرا + وێنە

لە سەر زنجیرە چیاكانی “چلچەمە” یادی “موقبێل هونەرپەژوو” شاخەوانی كۆچكردووی خەڵكی شاری بۆكان بەرز راگیرا.

بە پێی هەواڵی گەیشتوو بە “زاگرۆس پۆست”، لە ماوەی رۆژانی پێنجشەممە و هەینی 15 و 16ی مانگی جۆزەردان 26 كەس پێكهاتوو لە گرووپی شاخەوانیی “داڵان پەڕ”ی شاری سەقز و “ئەنجومەنی شاخەوانیی شاری مەهاباد” سەردانی زنجیرە چیاكانی “چلچەمە”یان كرد و بە هەڵكردنی پلاكارد و رەسمی شاخەوانی كۆچكردووی كورد “موقبێل هونەرپەژوو”یان بەرز راگرت.

ئەو گرووپە هەموو ساڵێك و لەم كاتانەدا سەردانی زنجیرە چیاكانی قەندیلیان دەكرد بەڵام ئەمساڵ بەهۆی میلیتاریزە بوونی خاڵە سنوورییەكانی كوردستان، نەچوونە قەندیل و بە سەر شاخەكانی چلچەمەدا سەركەوتن.

تیمی شاخەوانیی “داڵان پەڕ” لە شاری سەقز رێكەوتی 22ی مانگی گوڵانیش توانییان بەسەر لووتكەی كێوی “بڵقەیس” دا سەركەون و شانازییەكی دیكە بۆ خۆیان و وەرزشی شاخەوانیی كوردستان تۆمار بكەن.

بە وتەی سەرپەرەستی گرووپەكە: گرووپی شاخەوانیی “داڵان پەڕ” پێكهاتوو لە 37 شاخەوانی خەڵكی شاری سەقز و دەوروبەری توانیویانە بەسەر لووتكەی بڵقەیس لە ناوچەی تەختی سلێمانی تیكاب سەركەون.

كێوی بڵقەیس لە 8 كیلۆمەتری باكووری رۆژهەڵاتی تەختی سلێمان سەر بە شاری تیكاب 2 لووتكەی بە بەرزایی 3200 میتر و 3655 میتر هەیە و لە ریزی زنجیرە كێوەكانی رۆژهەڵاتی دەریاچەی ورمێدایە.

هەروەها لە ماوەی رۆژانی پێنجشەممە 10ی مانگی گوڵان تا رۆژی شەممە 12ی مانگ، دوو گرووپی شاخەوانیی “دۆستی”ی بانە و “داڵانپەڕ”ی سەقز بەسەر بەرزاییەكانی “شاهۆ” لە پارێزگای كرماشان سەكەوتن.

ئەم گرووپانە لە ریزی چالاكترین گرووپە شاخەوانیەكانی كوردستاندان و  15 ساڵە چالاكی دەكەن و جگە لەم چالاكیەش چەندین چالاكیی دیكەیان ئەنجام داوە و تا ئێستا 4 جار بەسەر شاخەكانی قەندیل دا سەركەوتوون.

جێگای ئاماژەیە، كێوی شاهۆ سێ هەزار و 390 میتر بەرزە و بەرزترین شاخی پارێزگای كرماشان دێتە ئەژمار كە لە پارێزگای سنەوە دەست پێ دەكات و بەشێك لە زنجیرە چیاكانی زاگرۆس دێتە ئەژمار و لە پارێزگای كرماشان و لە نزیك چۆمی سیروان كۆتایی پێ دێت و وەكوو گرنگترین و بەناوبانگترین كێوی ناوچەی هەورامان دێتە ئەژمار.