پێنج شه‌ممه‌ 28 ئازار 2024

پەکەکە ئاسنی سارد دەکوتێ / ئارام مودەڕسی

(پە کە کە لە گەڵ کلتوور و مێژوو و پرەنسیپەکانی خەباتی رزگاریخوازانەی گەلی کورد لە کوردستانی رۆژهەڵات بێگانەیە)

ماوەی چەند رۆژێکە هەواڵی “گەمارۆ دران”(هەوڵی رێگری کردن لە چالاکی) ژمارەیەک لە پێشمەرگەکانی حیزبی دیموکراتی کوردستانی ئێران لە ناوچە سنوورێیەکانی کوردستانی رۆژهەڵات لە لایەن “شەروانانی پە کە کە” بڵاو بۆتەوە. ئەم کردەوەیەی برادەرانی پە کە کە وەک هەموو دیاردە سەیر و سەمەرەکان لە ئاستی جواروجۆردا کاردانەوەی لێکەوتۆتەوە و هەر کەس و لایەنێک هەڵبەت لە گۆشە نیگای خۆیەوە لۆمەی ئەم “ملهووریە”ی کردووە،لەو نێوەشدا هەڵوێست و کاردانەوەی حیزب و کەسایەتی و تێکۆشەرانی کوردستانی رۆژهەڵات جێگای سەرنج و دەرس لێوەرگرتنە.

لە هەڵوێستی هەموو کوردێکی خاوەن بریار و خاوەن خەباتدا جۆرێک سەربزێوی و گەردنکەشی دەبیندرێ کە ئەوە خۆی زادە و خەسڵەتی بزووتنەوە رەوا و رزگاریخوازانەکەیەتی و،رێک ئەوە ش گەرەترین کێشە و ئاستەنگی پە کە کە یە.پەکەکە لەگەڵ کلتوور و مێژوو و پرەنسیپەکانی خەباتی رزگاریخوازانەی گەلی کورد لە کوردستانی رۆژهەڵات بێگانەیە و خەریکە ئاسنی سارد دەکوتێ و بە دڵنیاییەوە ئەگەر پەکەکە بە خویدا نەچێتەوە بە “تەڵە”ی مێژووە بووە.

من ناچمە سەر وردەکاری و “موو لە ماست کێشان”ی کێشەکە و دڵنیام هەموومان دەزانن کە “هەویری پە کە کە زۆر ئاو دەکێشێ”،بەڵام دەبێ هەموو کەس بزانێ کە خەباتی رزگاریخوازانەی گەلی کورد لە کوردستانی رۆژهەڵات تەنیا خەباتێکی چەکداری بۆ ئامانج و قۆناغێکی دیاریکراو و کاتی نەبووە و زادە و خوڵقێنەری گەلێک داهێنان و پرەنسیپ و پێناسەیە کە مایەی شانازی هەموومانە.

کەمتر خەباتێکی رزگاریخوانەی گەلانی بن دەست هەیە هێندەی خەبات و تێکۆشانی گەلی کورد بە تایبەت لە کوردستانی رۆژهەڵات هەوێنی توخمەکانی دێموکراسی و تۆلێرانس و پلۆرالیزم بێ.نامهەوێ فاکتۆر لە کێشە و ئاستەنگەکانی قۆناغێکی مێژوویی لە ژیانی مەیدانیی حیزب و لایەنەکانی کوردستان و بە تایبەت کۆمەڵە و دێمۆکرات بگرم،بەڵام گرینگ ئەوەیە کە خەباتی کوردەکانی کوردستانی رۆژهەلات چ لە چوارچێوەی حیزبە سیاسیە ناسراوەکانیدا و چ وەک خەباتی مەدەنی و سەربەخۆ لەگەڵ گۆرانکارییەکان و لە گەڵ پێناسەکانی مۆدێرنیتە و شارستانییەتدا بەرەو پێش چۆوە و لەو رەوتی گەشە و بەرەوپێشچوونەیدا گەلیک پرەنسیپ و سووننەتی چەسپاندووە کە ئیتر گەرانەوەی بەرەو دوا نامووکینە.

حیزبەکانی کوردستانی رۆهەڵات سەلماندوویانە کە بە حەق نوێنەری خەباتێکی مۆدێرن و ئینسانی و پێشکەوتنخوازن و پێناسە کردن و ناسینەوەی سووننەتە مۆدێرن و شارستانییەکانی خەباتێکی رەوا و رزگاریخوازانە بە بێ ئەوان مووکین نییە.

خەبات لە کوردستانی رۆژهەڵات خەباتێکی تەنیا و بێ پشتیوان و پشتگرە،بەڵام رەسەن و خاوەن سووننەت و خاوەن مێژوو و شوێندانەرە و بە ئاسانی دەستەمۆ و دیل نابێ.پەکەکە دەبوو بیر لەوە بکاتەوە بۆ تا ئێستا نەیتوانییوە مۆنۆپۆلی سیاسەت و خەبات و “بوون” بکات لە کوردستانی رۆژهەڵات؟زۆر گرینگە و زۆر پێویستە کە پەکەکە بیر لەوە بکاتەوە وەک هێزێکی کوردیی کوردستانی باکور دۆست و هاوکار و هاوخەباتی بزووتنەوەی رزگاریخوازانەی گەلی کورد بێ لە پارچەکانی تری کوردستان نەک ئاستەنگ و رێگر.لەوش گرینگتر پەکەکە و لەسەرووی ئەوانیش دەبێ باش بزانن بزووتنەوەی رزگاریخوازانەی گەلی کورد شەپۆلێکی سەربزێو و یاغییە،دەستەمۆ و ماڵی نابێ.

بابەتی هاوپۆل

قفس، یادداشت چهارم: پیش‌بند “به یاد سپیده فرهان”

مژگان کاوسی تا کنون دو بار بازداشت شده‌ام و هر دو بار در خانه‌ی خودم؛ …

2 بۆچوونەکان

  1. ناوه‌ندی چاپه‌مه‌نی و راگه‌یاندنی هێزه‌كانی پاراستنی گه‌ل “هه‌په‌گه‌”، ده‌رباره‌ی ئاڵۆزی نێوان گه‌ریلاكانیان و پێشمه‌رگه‌كانی حزبی دیموكراتی كوردستان – ئێران راگه‌یه‌ندراوێكی‌ بڵاوكرده‌وه‌ و رایگه‌یاند كه‌ بۆ ڕوونكردنه‌وه‌ و چارسه‌ركردنی ئه‌و مه‌سه‌له‌یه‌ بۆ هه‌موو جۆره‌ لێپرسینه‌وه‌ و گفتوگۆیه‌ك ئاماده‌ین.

    ناوه‌ندی راگه‌یاندن و چاپه‌مه‌نی هه‌په‌گه‌ ده‌رباره‌ی رووداوه‌كه‌ی ئه‌مڕۆی‌ كێله‌شین رایگه‌یاند كه‌ “گروپێك له‌ پێشمه‌رگه‌ی حزبی دیموكراتی كوردستان – ئێران كه‌ له‌ 15 بۆ 20 كه‌س پێكده‌هاتن، هاتنه‌ هه‌رێمی خنێره‌ و رایانگه‌یاند كه‌ ده‌خوازن بچنه‌ ڕۆژهه‌ڵاتی كوردستان، بۆچوونیان هاوكاریان كرا، به‌ڵام پاشان ئه‌م گروپه‌ سنوره‌كه‌یان ده‌رباز نه‌كرد له‌ نزیك گه‌ریلاوه‌ خاڵیان داناوه‌، دوێنێش له‌ كاته‌كانی 5 ی ئێواره‌، 7 بۆ 8 ئۆتۆمبێلی هێزه‌كانی حزبی دیموكراتی كوردستان كه‌ له‌ دیاناوه‌ ده‌هاتن له‌ هه‌رێمی به‌ربزن خاڵێكیان دروست كرد”.

    له‌ راگه‌یه‌ندراوه‌كه‌دا هاتووه‌ “بۆ تێگه‌یشتن له‌ ئامانجی حزبی دیموكراتی كوردستان شاندێكمان نارده‌ لایان و له‌ به‌ربزن له‌گه‌ل هێزێكی 60 تاوه‌كو 70 پێشمه‌رگه‌ چاوپێكه‌وتن ئه‌نجامدرا. پاشان هێزه‌كانمان چوونه‌ خنێره‌ و بینیان تیمێك له‌ پێشمه‌رگه‌كان له‌ پشته‌وه‌ خواستویانه‌ به‌دزییه‌وه‌ نزیكی هه‌ڤاڵانمان ببنه‌وه‌ و چه‌كیان بكه‌ن”.
    هه‌په‌گه‌ ده‌ڵێت: “له‌سه‌ر ئه‌وه‌ش هه‌ڤاڵانمان وشیاریان كردونه‌ته‌وه‌ و پێیان وتوون نزیك نه‌بنه‌وه‌، به‌ڵام ئه‌وان گوێیان به‌و وشیاریه‌ نه‌داوه‌. ئه‌و هێزه‌ی ئێمه‌ش بۆ ئامانجی وشیاری فیشه‌كیان ته‌قاندوه‌. له‌وی شه‌ڕێكی ٣-٤ ده‌قه‌یی ڕوویداوه‌”.

    راشیگه‌یاندووه‌ كه‌ “به‌ڕێوه‌به‌رانمان له‌و هه‌رێمه‌ یه‌كسه‌ر خۆیان له‌ مه‌سه‌له‌كه‌ گه‌یاند و شه‌ڕه‌كه‌ راوه‌ستا و له‌گه‌ڵ فه‌رمانداری تیمه‌كه‌ دیداریان ئه‌نجام دا. له‌ ئاكامدا پێشمه‌رگه‌یه‌كی بریندار بۆ تیماركردن گوازرایه‌وه‌ نه‌خۆشخانه‌یه‌كی ئێمه‌، پێشمه‌رگه‌كانی تر كشانه‌وه‌. بۆ ئه‌وه‌ی ئه‌و كێشه‌یه‌ به‌ڕێی دیالۆگ و به‌ شێوه‌یه‌كی ئاشتیانه‌ چاره‌سه‌ر ببێ درێژه‌ به‌ به‌ دیداره‌كان ده‌درێت”.

    هه‌په‌گه‌ جه‌خت له‌وه‌ ده‌كاته‌وه‌ كه‌ هیچ نیازێكی هێرش و شه‌ڕیان نییه‌ و رایگه‌یاند كه‌ “ده‌بێ گه‌له‌كه‌مان و ڕای گشتی باش بزانێ ئێمه‌ لایه‌نگری شه‌ڕ و هێرش نین، تیمه‌كانی ئه‌وێمان كاتێ بینمان ده‌یانه‌وێ چه‌كمان بكه‌ن، ناچاربووین وشیاریان بكه‌ینه‌وه‌. ئێمه‌ له‌ كه‌وتنه‌وه‌ی ئه‌و شه‌ڕ و شه‌هید بوونی پێشه‌رگه‌یه‌ك دڵگرانین و ڕاستی ڕوداوه‌كه‌ به‌وشێوه‌یه‌وه‌ نه‌ك پێشتر پلانڕێژكراو بێ”.

    دووپاتیشیكردووه‌ته‌وه‌ كه‌ “هه‌ندێ ده‌زگای ڕاگه‌یاندن ده‌یانه‌وێ ئێمه‌ وه‌ك هێرشبه‌ر نیشان بده‌ن، به‌ڵام ئه‌وه‌ راست نییه‌ و ئه‌وه‌ش به‌ نیازێكی باش ناكرێ”.

    له‌ كۆتایی راگه‌یه‌ندراوه‌كه‌دا ناوه‌ندی‌ چاپه‌مه‌نی‌ و راگه‌یاندنی‌ هێزه‌كانی پاراستنی گه‌ل ده‌ڵێت: “بۆ ڕوون كردنه‌وه‌ی و چاره‌سه‌ركردنی ئه‌و مه‌سه‌له‌یه‌ ئێمه‌ بۆ هه‌موو جۆره‌ لێپرسینه‌وه‌ و گفتوگۆیه‌ك ئاماده‌ین. بانگ له‌ ته‌واوی گه‌له‌كه‌مان و دیموكراتییه‌كانیش ده‌كه‌ین له‌ دژی هه‌ڵوێستی نانه‌ته‌وه‌یی بن”.

وەڵامێک بنووسە

پۆستی ئەلکترۆنیکەت بڵاو ناکرێتەوە .

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.