زاگرۆس پۆست
لە ئاكامی خۆپیشاندانی بەرینی خەڵكی شاری مەهاباد لانیكەم 20 كەس بریندار بوون.
بە پێی راپۆرتی سەرچاوەكانی هەواڵ، لە ئاكامی شەڕی و تێكهەڵچوونەكانی جەماوەری خۆپیشاندەری شاری مەهاباد لە رۆژی پێنجشەممە 17ی مانگی گوڵان، لانیكەم 20 كەس بریندار بوون.
ئەو شەڕ و خۆپیشاندانە كە لە ئاكامی گیانلەدەستدانی “فەریناز خۆسرەوانی” هاتە ئاراوە، هەموو چالاكانی تۆڕە كۆمەڵایەتیەكان و هەروەها جەماوەری خەڵكی كوردستان تووشی تووڕەیی و هەڵچوون كرد و لە ئاكامیشدا خەڵكی شاری مەهاباد بۆ ناڕەزایی بەرامبەر بەو جینایەتەی بەرامبەر بە ئەو كچە روویدا، رژانە سەرشەقامەكان و وێڕای ئاگرتێبەردانی هۆتێل “تارا” لە شاری مەهاباد.
هەروەها خۆپیشاندەران لەگەڵ هێزەكانی كۆماری ئیسلامیش تووشی تێكهەڵچوون بوون و بەو بۆنەوە لانیكەم 20 كەس بریندار بوونە كە لەو رێژەیە 2 كەسیان برینەكانیان قورسە و لە ترسی دەستگیركران، سەردانی هیچ ناوەندێكی پزیشكیان نەكردوە و گیانیان لە مەترسیدایە.
