كچێكی كورد بۆ ئەوە لەلایەن كەسێكی ئیتلاعاتی دەستدرێژی نەكرێتەسەری خۆی كوشت

كچێكی گەنجی شاری مەهاباد لەترسی دەستدرێژی كارمەندێكی ئیتلاعاتی ئەو شارە خۆی لە بینای هۆتێلێكی 4 نهۆمی خستەخوارەوە‌و گیانی لەدەستدا.
كەسێكی نزیك لەبنەماڵەی ئەو كچە بە زاگرۆس پۆستی راگەیاند: ئەو كچە بەناوی (فەریناز. ز) كە كارمەندی هۆتێلی “تارا” لەشاری مەهاباد بووە لەلایەن خاوەنی هۆتێلەكەوە بەناوی نادر مەولودی دەخرێتە ژێر گوشارەوە تا ناچاری بكات لەگەڵ كارمەندێكی ئیدارەی ئیتلاعاتی ئەوشارە كردەوەی سێكسی ئەنجام بدات، لەبەرامبەردا هۆتێلی ناوبراو بكرێتە 5 ئەستێرە، بەڵام كچەكە بەوە رازی نابێت.

بەوتەی سەرچاوەكە پاش ئەوەی خاوەنی هۆتێلەكە پیلان بۆ دەستدرێژی ئەو كارمەندەی ئیتلاعات بۆ سەر كچەكە دەڕێژێت‌و لەژوورێكی هۆتێلەكە لەگەڵ كچەكە دەرگایان لەسەر قوفڵ دەكات، فەریناز كە رێگەی دەرباز بوونی نەبووە‌و دەرگای لەسەر داخراوە، لەپەنجەرەی نهۆمی چوارەمی هۆتێلەكە خۆی دەخاتە خوارەوە‌و گیانی لەدەست دەدات.
سەرچاوەكەی زاگرۆس پۆست وتیشی: تا ئێستا تەرمی فەریناز لە پزیشكی یاسایی مەهابادە‌و بنەماڵەی كچەكە سكاڵایان لەو كارمەندەی ئیتلاعات‌و خاوەنی هۆتێلەكە كردوە بەڵام تا ئێستا هیچیان دەستگیر نەكراون.

خۆكوشتنی كچێكی لاو لەشاری مەهاباد، رای گشتی خەڵكی شاری نیگەران ‌و توڕە كردوە‌و دەنگ‌و هەرایەكی زۆری ناوەتەوە.