زاگرۆس پۆست
گیرۆدەبوون بە مادەهۆشبەرەكان لە نێو ژنانی ئێراندا لە حاڵی بەرزبوونەوە دایەو بەپێی ئامارەكان لە ساڵی ڕابردوو واتە ساڵی لە 1393 دا 279 ژن بە هۆی بەكاهێنانی مادەی هۆشبەرەوە گیانیان لەدەست داوە كە ئەم ڕێژەیە لە چاو ساڵی 1392 نزیك بە 33% زیادی كردوە.
چالاكانی كۆمەڵایەتی دەڵێن ئەوەی هەموو لایەكی نیگەران كردوەو ڕووتێكردنی ژنان بۆلای مادەگەلێكی وەك شیشەیە.
بەوتەی كارناسان، لە ڕابردووشدا كۆمەڵێكی زۆر لە ژنان گیرۆدەی مادەهۆشبەرەكان دەبوون، بەڵام جیاوازیی گیرۆدەبوونی ژنان لە ڕابردوو و ئێستا لە جۆری ماددەی هۆشبەر، ڕێژەی ئەم ماددانە و تەمەنی گیرۆدە بوونی ئەم ژنانەیە. ئەوان دەڵێن ئەگەر لە ڕابردوودا هێندێك لە ژنانی ئێرانی وێڕای مێردەكانیان خەریكی تریاك كێشان بوون، ئێستا كچە مێرمنداڵەكان لەم وڵاتە، بەدوور لە بنەماڵەكانیان‌و، ئەم جارە ماددەی هۆشبەری لە چەشنی شیشەو ماریجووانا دەكێشن.
بەپێی ئامارە ڕەسمییەكان، ژنان بە گشتی 10%ی حەشیمەتی موعتادەكانی ئێران پێك دێنن. ئەم ڕێژەیەش زۆرتر لە قۆناخی تەمەنی نێوان 20 تا 36 ساڵدا بەدی دەكرێ‌و تەمەنی مەترسیدار بۆ تووش بوون بە ماددەی هۆشبەر لە نێو ژناندا 15 تا 19 ساڵە. جگە لەم ئامارە، زۆر كەس پێیان وایە بەشێكی زۆری ڕێژەی تووشبوونی ژنان بە ماددەی سڕكەر بە شاراوەیی ماوەتەوە. چونكی لەوانەیە گیرۆدەبوونی ژنان بە مادەهۆشبەرەكان بە هۆكارە جۆربەجۆرە كۆمەڵایەتیی و كلتوریەكان ئاشكرا نەكرێ.
