زاگرۆس پۆست
دادگایەك لە ئیسرائیل، رۆژی سێشەممە سزای ٧ ساڵ زیندانی بەسەر هاوڵاتیەكی بلژیكی بە ڕەگەز ئێرانیدا سەپاند، كە بە تۆمەتی سیخوڕیكردن بۆ ئێران دەستگیر كرابوو.
“عەلی مەنسووری” ساڵی ٢٠١٣ ، كاتێك كە دەیویست ئیسرائیل بەجێبهێڵێت، لە فڕۆكەخانەی بن گۆریۆن دەستگیركرا.
بە وتەی دەزگای ئەمنیی ئیسرائیل، عەلی مەنسووری لە كاتی دەستگیركرانیدا، كۆمەڵێك وێنەی باڵیۆزخانەی ئەمریكا و شوێنە ئەمنییەكانی دیكەی ئیسرائیلی پێبووە.
داواكاری گشتیی ئیسرائیل لە دانیشتنی دادگادا وتی: “عەلی مەنسووری دانی بەوەدا ناوە، كە دەزگا هەواڵگرییەكانی ئێران، بەڵێنیان پێداوە لە پاداشتی سیخوڕیكردندا، لە رێگای دامەزراندنی یەكەیەكی بازرگانی لە ئیسرائیل، ملیۆنێك دۆلاری بدەنێ”.
پارێزەری عەلی مەنسووری دەڵێ بەنیاز نییە بەرامبەر ئەو حوكمە دەنگ هەڵبڕێت.
