زاگرۆس پۆست
لە ئاكامی كەوتنە خوارەوەی هێلیكۆپترێكی سپای پاسدارانی كۆماری ئیسلامی ئێران لە سیستان و بەلوچستان، 2 چەكداری كۆماری ئیسلامی بریندار بوون.
بە پێی راپۆرتی كەمپەینی چالاكانی بەلوچ، لە ئاكامی ناردنی هێزەكانی سپای پاسداران بۆ ناوچە كوێستانیەكانی قەسرقەند و تێكهەڵچوون لەگەڵ ئەوەیكە لە لایەن ماڵپەڕەكانی سپای پاسدارانەوە بە “شەڕ ئەنگێز” و “تیرۆریست” ناوی لێ دەبرێ، هێلیكۆپترێكی سپا كەوتووەتە خوارەوە و 2 سەرنشینەكەی كوژراو و بریندار بوون.
یەكێك لە ئەندامانی شورای قەسرقەنی بە پشتڕاست كردنەوەی ئەو هەواڵە بە كەمپەینی راگەیاندووە: هەلیكۆپترێكی سەر بە سپا بە هۆی ئەوەی پەروانەكەی بە كێوەكە كەوتووە، كەوتووەتە خوارەوە و پەیوەندییەكی بە كەسانی چەكدارەوە نیە.
ئەو سەرچاوەیە هەروەها دەڵێ: لە ئاكامی ئەو تێكهەڵچوونانەدا لەگەڵ “ئەشرار” ژمارەیەك كوژراو و بریندار بوون و ژمارەیەك لە هێزەكانی سپایش كوژراون.
ناوبراو دەشڵێ: ئەو تێكهەڵچوونانە ماوەی 3 رۆژە لە كێوەكانی قەسرقەند بەردەوامە بەڵام بەهۆی ئەوەیكە هەموو رێگاكان بۆ ناوچەكە لە لایەن هێزە ئەمنیەتیەكانەوە داخراوە و خودی سپایش ئامارێكی لەمبارەوە بڵاو نەكردووەتەوە، رێژەی كوژراو و بریندارەكان نادیارە.
ئەمەش لەحاڵێكدایە، رۆژی رابردوو سپای پاسداران رایگەیاند كە تیمێكی تیرۆریستی لە ناوچەی سیستان و بەلوچستان لەنێو بردووە و پاش ئەوەش یاریدەدەری پارێزگاری سیستان رایگەیاند 8 كەس لە هێزەكانی سنوورپارێزی ئێران بە دەستی كەسانی نەناسراو كوژراون و دواتریش گرووپی جەیشۆلعەدل بەرپرسیاریەتی ئەو هێرشەی گرتە ئەستۆ.
