زاگرۆس پۆست
لە ماوەی 10 مانگی سەرەتای ئەمساڵ، زیاتر لە 2 هەزار عەمەلیاتی دۆزینەوە و دەستبەسەراگرتنی كەلوپەلی كاسبكاران لە پارێزگای ورمێ ئەنجام دراوە.
بە پێی وتەی “شەهرام عەباسی” فەرماندەی هێزەكان سەر سنووری كۆماری ئیسلامی لە پارێزگای ورمێ، لە ماوەی 10 مانگی سەرەتای ئەمساڵدا زیاتر لە 2 هەزار عەمەلیاتی هێرش بۆ سەر كاسبكاران كە ئەو بە (قاچاقخچی) ناوی لێ بردوون، بە مەبەستی دۆزینەوە و دەستبەسەراگرتنی كەلوپەلەكانیان ئەنجام دراوە.
ناوبراو لە درێژەدا دەڵێ: لەو عەمەلیاتانەدا “پتر لە یەك میلیۆن لیتر سووتەمەنی، 3 هەزار و 684 میتر پارچە، 40 هەزار بەستە جل، 22 هەزار جۆر كەلوپەلی پەیوەندیدار بە جوانكاریی، 7 هەزار و 909 سەر مەڕ و ماڵات و 478 دانە جگەرە” لە سەرانسەر پارێزگای ورمێ دەستی بەسەردا گیراوە.
لە لایەكی دیكەوە، بەرپرسی گشتیی تەعزیراتی پاریزگای ورمێ باس لەوە دەكات، كە لەم رۆژانەی دواییدا لە شارەكانی “میاندواو و مەهاباد” لە 2 دۆسیەی جیاجیادا كاسبكاران بە دانی 80 میلیۆن و 490 هەزار جەریمەی نەختی مەحكوم كراون و هەموو كەلوپەلەكانیشیان دەستی بەسەردا گیراوە.
“محەمەد ئەقوامی” لە درێژەدا دەڵێ: بە هۆی دەستبەسەردا گرتنی ئۆتۆمبیلێكی پرش لە جل و بەرگری بیانی كاسبكارێك بە 38 میلیۆن و 928 هەزار تمەن جەریمە مەحكوم كراوە و لە بە هۆی زەوت كردنی 12 هەزار دانە كەلوپەلی جوانكاریی كاسبكارێكی مەهابادی 46 میلیۆن و 100 هەزار تمەن جەریمەی بەسەردا سەپاوە و هەموو كەلوپەلەكانیشی لێ زەوت كراوە.
جێگای ئاماژەیە، كەمتر رۆژێك هەیە كاسبكاران و كۆڵبەران لە سنوورەكانی هەر 4 پارێزگای كوردنشینی “ئیلام، كرماشان، سنە و ورمێ” لە لایەن هێزەكانی كۆماری ئیسلامیەوە هێرش نەكرێتە سەر و ئەو كاسبكارانە كە تەنیا بە مەبەستی وەدەستهێنانی بژیوی بنەماڵەكانیان دەستیان داوەتە كاسبكاری، بەرەوڕووی خەساری گیانی و ماڵی نەبنەوە.
