زاگرۆس پۆست
دەوڵەتی ئیسلامی ناسراو بە “داعش” رۆژی شەممە 11ی مانگی رێبەندان بە بڵاو كردنەوەی گرتەیەكی ڤیدیۆیی “كێنجی گۆتۆ” هەواڵنێریی “ژاپۆن”ی كە بە بارمتە گیرابوو، سەربڕیوە.
داعش هەفتەی رابردوویش هاوڵاتیەكی دیكەی ژاپۆنی بە ناوی “هارونا یوكاوا” سەربڕیبوو و لە بەرانبەر ئازادكردنی ئەم بارمتە دووهەمیەدا داوای پێدانی 200 میلیۆن دۆلار پارەی كردبوو و پاش ئەوەیكە دەوڵەتی ژاپۆن ئەو بڕە پارەیە پێ نەدان، بارمتەگیراوەكەی سەربڕی.
هەر لەم پەیوەندەدا كابینەی “شینزۆ ئابە” سەرۆك وەزیرانی ژاپۆن كۆبوونەوەیەك دەبەستێت بە مەبەستی پشتڕاست كردنەوەی ئەو گرتە ڤیدیۆییە.
داعش تا ئێستا چەندین بارمتەگیراوی لە وڵاتانی جیاجیای جیهان و بەتایبەت وڵاتانی رۆژئاوایی سەربڕیوە و لەم دواییانەشدا هەڕەشەی لە دەوڵەتی ئۆردۆن كردبوو، كە ئەگەر “ساجدەلڕیشاوی” ئەو ژنە خۆكوژەی كە لە لای ئۆردۆن بە دیل گراوە ئازاد نەكات، فڕۆكە وانە بارمتەگیراوەكە بەرەوڕوو مەرگ دەكاتەوە.
