زاگرۆس پۆست
بە وتەی پارێزگای ورمێ، ئێستاكە 40 هەزار كەس كە خوێندنیان لە پلەی كارناسی و سەرەوەتر تەواو كردووە و هێشتاكە بێكارن و بەدوای كاردا دەگرێن، لەو پارێزگایە بوونی هەیە.
ناوراو وێڕای ئاماژەدان بەو ئامارە، دەڵێ: بۆ چارەسەر كردنی ئەو گرفتە دەبێ سەرمایەگوزاریی بكرێت، بەڵام ئاڵۆزیی كاروباری ئیداری پێشی بە كەڵك وەرگرتن لە زەرفیەتی سەرمایەگوزاریی لە كەرتی تایبەت و ئەو پرۆژانەی كە دەتواندرێ بدرێتە كەرتی تایبەت گرتووە.
پارێزگاری ورمێ دەشڵێ: ئەو 40 هەزار خوێندەوارە بێكارە سەرمایەگەلێكن كە لە دۆخی دژواردا خوێندنیان تواو كردووە و ئێستا بەو چەشنە لە چاوەڕوانی هەلی كاردان.
لە لایەكی دیكەوە، بە پێی دوایین پێوەرەكانی بێكاریی لە ئێران پارێزگای كرماشان لە رۆژهەڵاتی كوردستان بە 15.3% بێكاری لە پلەی یەكەمدایە و لوڕستان بە 14.9% لە پلەی دووهەم و قەزوین لە تەنیشت چوارمەحاڵ و بەختیاری پلەی سێهەمی بێكارییان لە ئێراندا هەیە.
جێگای باسە: 4 پارێزگای رۆژهەڵاتی كوردستان لەوانە “ئیلام، كرماشان، سنە و ورمێ” لە ئاستی ئێراندا و لە بواری كێشە و كەم و كۆڕیە كۆمەڵایەتیەكاندا لە پلەكانی یەكەمدان و هەمیشە لە لایەن كاربەدەستان و ئۆرگانە حكومەتییەكانەوە بە چاوێكی ئەمنیەتیەوە سەیر دەكرێن و وێڕای ئەوەیكە كوردستان سروشت و خاكێكی دەوڵەمەندی هەیە، بەڵام بە پێی پێویست و گونجاو لە لایەن حكومەتەوە ئاوڕی لێنادرێتەوە.
