زاگرۆس پۆست
پاش كۆتایی هاتنی پڕۆسەی ئازادكردنی شاری كۆبانێ لە لایەن یەكینەكانی پاراستنی گەل و هێزەكانی پێشمەرگەوە، بڕیارە لە شاری سنە بەو بۆنەوە شادی و سەما بكرێ.
بە پێی ئەو هەواڵانەی بە “زاگرۆس پۆست” گەیشتووە، بڕیارە سبەینێ كاتژمێر 11ی بەرەبەیانی لە مەیدانی گاز و پاركی منداڵانی شاری سنە، بە بۆنەی ئازادكرانی شاری كۆبانێ رێوڕەسمی شایی و خۆشی بەڕێوە بچێت و هەموو ئۆتۆمبیلەكان گڵۆپەكانیان هەڵبەكەن.
هەواڵەكە باس لەوە دەكات، بڕیارە لەو كۆبوونەوەیەدا كە بە بۆنەی ئازادكرانی شاری كۆبانێیەوە بەڕێوە دەچێ دروشمگەلێكی وەكوو “بژی كۆبانێ و بژی كورد، هەروەها كۆبانێ كۆبانێ تۆ سنەی قارەمانی” بوترێتەوە.
شایانی باسە، نزیكەی دوو مانگ پێش ئێستا و پاش هێرشی چەكدارانی داعش بۆ سەر كۆبانێ لە هەموو جیهان و بەتایبەت لە كوردستانی رۆژهەڵات كۆبوونەوەگەلێكی بەرین بە مەبەستی پشتیوانی دەربڕین لە خەڵكی كۆبانێ بەڕێوەچوو و لە ئاكامدا لە هەموو شارەكان و لەوانە شاری سنە ژمارەیەكی زۆر لە چالاكانی پیشەیی و مەدەنی بە بۆنەی رێكخستن و بەشداریی كردن لەو كۆبوونەوانە دەستگیر و حوكمی زیندانیان بەسەردا سەپا.
