زاگرۆس پۆست
چەندین ئاسەواریی مێژوویی تایبەت بە هەزار ساڵ پێش لە زایین لە شاری دیواندەرە دەستی بەسەردا گیرا.
“قودرەت سوزەنی” فەرماندەی هێزە ئینتزامیەكانی شاری دیواندەرە وێڕای راگەیاندنی ئەو هەواڵە دەڵێ: پاش گەڕین و پشكنینی هێزە ئەمنیەتیەكان، كەسێك بە تاوانی كڕین و فرۆشتنی كەلوپەلی كۆن و مێژوویی دەستگیر كرا و چەند كەلوپەلی وەكوو “پەیكەر، 6 لیرە، دەستبەندێك و دانێ گوڵی سەر”ی پێ بوو كە دەستی بەسەردا گیراوە.
ناوبراو لە درێژەدا دەڵێ: لیرەكان و پەیكەرەكان، هەموویان ساختە بوون و تەنیا گوڵی سەر و دەستبەنەكە بایەخی مێژووییان بووە و تایبەت بە هەزارەی پێش زایین بوون.
لەم ساڵانەی دواییدا بە هۆی لاوازبوونی بواری ئابووری و بژیوی خەڵكی كوردستان، زۆرێك لە لاوان بە كەرەستەی دۆزینەوەی ئاسن و ئاسەوارە مێژووییەكان بەر روو دەكەنە كێو و دەشت و ژیاكانی كوردستان و تا بە دۆزینەوەی ئەو ئاسەوارە بەنرخانە بگەنە سروەت و سامانێكی زۆر.
لە هەمان كاتدا باندگەلێكی زۆری سەر بە دام و دەزگا و كەسایەتیەكانی كۆماری ئیسلامی و بەتایبەت سپای پاسداران و كوڕەكەی هاشمی رەفسەنجانی تا ئێستا بە ئاستێكی لە رادەبەدەر ئاسەوار و كەلوپەلی بەنرخی و مێژووییان لە كوردستان بردووە و هیچ لایەنێكی حكومەتییش لەو جۆرە كەسانە ناپرسێتەوە.
