زاگرۆس پۆست
2 كەسی دیكە لە زیندانی شیراز و كەسێكیش لە زیندانی ئەردەكان ئێعدام كران و بەم پێیە رێژەی ئێعدامەكان لەم مانگەدا گەیشتە 55 كەس.
بە پێی راپۆرتی كۆمەڵەی چالاكانی مافی مرۆڤ لە ئێران، رۆژی شەممە 20ی مانگی بەفرانبار 3 كەس بە تاوانی دزیی كردن بە چەكەوە گواسترانەوە بۆ ژووریی تاكەكەسی زیندانی عادڵ ئابادی شیراز و سەرلەبەیانی رۆژی یەكشەممە 2 كەسیان لەسێدارە دران.
هەروەها دادگوستەریی پارێزگای یەزد رایگەیاند، كەسێك بە ناوی “ع_د” لە زیندانی ئەردەكان بە تاوانی ئەنجامدانی قەتڵ لە زیندانی شاری ئەردەكان لە لایەن دام و دەزگا قەزایی و ئەمنیەتیەكانی كۆماری ئیسلامیەوە لەسێدارە دراوە.
جێگای ئاماژەیە، لە سەرەتای مانگی بەفرانباری ئەمساڵەوە تا بە ئەمڕۆ واتە لە ماوەی 24 رۆژی رابردوودا لانیكەم 55 كەس لە زیندانە جیاجیاكانی ئێران لەسێدارە دراون و لەو رێژەیە 14 كەسیان هاوڵاتییانی كورد بوون كە یەكێكیان زیندانیەكی سیاسی كورد بە ناوی”سابیر موخەلید موانە” بوو، كە بە هۆی پەیوەندیی لەگەڵ “كۆمەڵە”، لە لایەن دام و دەزگا قەزایی و ئەمنیەتیەكانی كۆماری ئیسلامیەوە لەسێدارە دران.
