زاگرۆس پۆست
حەفتە نامەی “ئێشپیگڵ”ی ئاڵمانی لە هەواڵێكی بە بەڵگەوە، باس لەوە دەكات كە بەشار ئەسەد بە یارمەتی كۆماری ئیسلامی ئێران وزەخانەیەكی ئەتۆمی لە سوریە دامەزراندووە.
بەپێی راپۆرتی ئەو هەفتە نامە ئاڵمانیە، كە ئەمڕۆ شەممە 20ی مانگی بەفرانبار بڵاوی كردووەتەوە، وزەخانەی ئەتۆمیی دەوڵەتی بەشار ئەسەد لە دوو كیلۆمیتریی سنووری لوبنان و بە هاوكاریی كۆماری ئیسلامی ئێران دامەزراوە.
ئەو حەفتەنامەیە رایگەیاندووە كە ئەو زانیارییانە لە رێگەی وێنەهەڵگرتنی ماهوارەیی و كۆنترۆڵی پەیوەندییە تەلەفۆنیەكانی دەزگای زانیاریی دەوڵەتی بەشار ئەسەد وەدەست هێنراوە.
دەوترێت “زەمزەم” نێوی نهێنیی ئەو وزەخانەیە كە بە هاریكاریی كۆماری ئیسلامی ئێرامی دامەزراوە و بەپێی وردەكارییەكان بۆ پیتاندنی ئۆرانیۆم بەكار دێت.
هەر لەو پەیوەندییەدا پاراستنی ئەو وزەخانەیە كە پاڵی داوەتە شاری “القصر”ەوە و لەوێوە ئاو و بەرقی بۆ دابین دەكرێ، لەئەستۆی “حزب الله”ی لوبنان دایە.
راپۆرتەكە باس لەوەش دەكات، كە دەوڵەتی سوریە ئێستاكە 8 هەزار ئۆستوانەی سووتەمەنی بۆ ئەو وزەخانەیە گواستووەتەوە كە بڕیار بوو لە وزەخانەی نهێنێ “ئەلكوبرا” كەڵكی لێ وەربگیردرێت.
وزەخانەی ئەلكوبرا هەڵكەوتوو لە ناوچە بیابانیەكانی رۆژهەڵاتی سوریە بوو، كە ساڵی 2007ی زایینی بە هۆی هێرشی ئاسمانیی ئیسرائیل لەنێوچوو و تا ئێستا ئیسرائیل ئەو هەواڵی پشڕاست یان ڕەت نەكردووەتەوە.
