زاگرۆس پۆست
بە وتەی یەكێك لە بەرپرسانی خزمەتگوزاریی پارێزگای “ورمێ” تەنیا 18% لە ئاواییەكانی پارێزگای ورمێ گازیان هەیە.
بە وتەی “مەنسور سادقیان” بەرپرسی گشتیی شیركەتی گازی پارێزگای ورمێ، بە ئاماژە بە نەبوونی گازی سروشتیی لە شارەكانی “ماكۆ، قەرەزیائەدین، نەغەدە و تیكاب”، دەڵێ: ئێستاكە 18 شار و پتر لە 110 ئاوایی لەو پارێزگایە گازیان هەیە و ئەوەش دەكاتە تەنیا 18% ی دانشتووانی ورمێ و 82% ی خەڵكی ئەو پارێزگایە لە هەبوونی گاز بێ بەرین.
مەنسور سادقیان، لە درێژەی وتەكانیدا دەڵێ: پاش گەڵاڵەی ئامانجداركردنی یارانەكان، هەڵگری وزە و بەكارهێنانی گازی ماڵان نزیكەی 7% كەمی كردووە و 9 شارۆژكەی پیشەیی لە پارێزگای ورمێ گازیان نیە.
ئاشكرا كردنی وەها ئامارێك لە لایەن كاربەدەستێكی دەوڵەتی لە پارێزگای ورمێ لەحاڵێكدایە، كە بە پێی ئاماری بەڕێوەبەرایەتی گشتیی ئامار و زانیاریی پارێزگای ورمێ ئێستاكە نزیكەی 600 هەزار خەڵكی گوندنشین لەو پارێزگایەدا هەیە، كە پتر لە هەزار ئاوایی نیشتەجێ بوون و زۆربەیان لە هەبوونی خزمەتگوزاریی گونجاو بێبەرین.
پێشتریش پارێزگاری ورمێ لە چاوپێكەوتنێك لەگەڵ بەڕێوەبەرایەتی گازی شیركەتی میللی گازی ئێران، دۆخ و پێوەرەكانی بڵاوكردنەوەی گاز لەو پارێزگایە بە نالەبار و خراپ وەسف كردبوو.
