یه‌ك شه‌ممه‌ 23 ئه‌یلول 2018
ماڵەوە / کوردستان / كوژران و بریندار بوونی 13 كەس بە هۆی رووداوی هاتوچۆ لە كوردستان

كوژران و بریندار بوونی 13 كەس بە هۆی رووداوی هاتوچۆ لە كوردستان

لە دوو رووداوی هاتوچۆی جیا جیادا 13 هاوڵاتی لە سەر جادەی نێوان سنە_ دیواندەرە و سەقز كوژراو و بریندار بوون.

بە پێی هەواڵی گەیشتوو بە “زاگرۆس پۆست”، ئێوارەی رۆژی شەممە لە 5 كیلۆمتری جادەی سنە_دیواندەرە و لە نزیك ئاوایی “خەیسوور” بە هۆی پێكدادانی 2 ئۆتۆمبیلی جۆی سەمەند و پژۆ 405، دەر دوو ئۆتۆمبیلەكە دەسووتێن و بەو هۆیەوە 2 كەس لە سەرنشینی پڕۆكە لە ئاوردا دەسووتێن و گیانیان لەدەست دەدەن و 5 كەسی دیكەش بە توندی بریندار و رەوانەی نەخۆشخانە دەكرێن، كە هەتا ئێستاش 2 كەسیان لە دۆخێكی زۆر نالەباردان و لە “كۆما”دا راگیراون.

لە رووداوێكی دیكەشدا كاتژمێر 7ی سەرلەبەیانی ئەمڕۆ سێشەممە 25ی مانگی سەرماوەز، لە سەر جادەی دیواندەرە_سەقز و لە نزیك ئاوایی “كەوڵە و ئەسحاب” بە هۆی پێكدادانی 2 ئۆتۆمبیل لە جۆری تویتا لەنكرۆزێر و پژۆ 405 دوو هاوڵاتی دەسبەجێ گیانیان لەدەست دەدەن و 4 كەسی دیكەش بە توندی بریندار دەبن.

شایانی باسە، جادەكانی رۆژهەڵاتی كوردستان زۆر ناستاندارد و مەترسیدارن و لە هەمان كاتیشدا ئۆتۆمبیلەكانی نێو ئێران بە هۆی ئابڵۆقە نێودەوڵەتیەكان و نەبوونی كەرەستەی خاوی تۆكمە بۆ دروستكردنی ئۆتۆمبیل، بەردەوام گیانی هاوڵاتیان دەخەنە مەترسیەوە و گیان لەدەستدان بە هۆی رووداوی هاتوچۆ لە ئێران و كوردستان، یەكێك لە سەرەكیترین هۆكارەكانی مردنی هاوڵاتیان دێتە ئەژمار.

جێگای وەبیرهێنانەوەیە، لە ماوەی رۆژانی رابردوودا هەواڵێكی دیكە لە لایەن “زاگرۆس پۆست” بڵاو كرایەوە كە تێیدا ئاماژە بەوە دەكات، 72% ی جادەی ئاواییەكانی سەر بە شاری كامیاران هێشتاكە قیرتاو نەكراون و لایەنە پەیوەندیدارەكانیش هیچ ئاوڕێ لەم بابەتە نادەنەوە.

بابەتی هاوپۆل

بریندار و گیان لە دەستدانی سێ کۆڵبەر لە سنووری چاڵدێران

ڕۆژی سێ شەممە ۲۷ی خەرمانان لە سنوری چاڵدێران هێزە چەکدارەکانی ڕژیم کاروانی کۆڵبەران دەدەنە بەر …