زاگرۆس پۆست
ژمارەیەك لە كرێكاری ئاواییەكانی دەوروبەری شاری سنە، لە زیندان راگرتنی چالاكێكی كرێكاریی خەڵكی ئەو شارەیان مەحكوم كردووە و خوازیاری ئازادیی بێ پێشمەرجی ناوبراو بوون.
بە پێی هەواڵی ماڵپەڕی پەیام، ژمارەیەك لە كرێكارانی ئاواییەكانی دەوروبەری شاری سنە لەوانە تەوریوەر، هەنەر، هەڵوان، تەنگی سەر، مەرۆبزان، نەوەڕە، كێڵانە و ئەوێهەنگ درێژەی لە زیندان راگرتنی هەڵسووڕاوی كرێكاری بەندكراو “فەردین میرەكی”یان مەحكوم كرد.
زیاتر لە ١٠ رۆژ لەكاتی بازداشتی فەردین میرەكی چالاكی كرێكاری و ئەندامی كومیتەی هەماهەنگی بۆ یارمەتیدان بە پێكهێنانی رێكخراوە كرێكارییەكان لە شاری سنە تێپەڕ دەبێت، بەڵام هێشتا لە زیندان ئازاد نەكراوە.
كرێكارانی ئاواییەكانی ناوچەی ژاوەرۆ و چەم شاری سنە وێڕای مەحكوم كردنی سیاسەتە سەركوتگەرانەكانی رژیم، خوازیاری ئازادی بێپێشمەرجی چالاكە كرێكاری بەندكراو فەردین میرەكی و زیندانیانی سیاسی دیكە لە زیندانەكانی كۆماری ئیسلامی بوون.
