زاگرۆس پۆست
له ماوه‌ی شه‌وورۆژی دوێنێ دووشه‌مه‌دا له سهردهشت 2 که‌س به هۆی رووداوی هاتوچۆو هاوڵاتییه‌کیش به هۆکاری کۆمه‌ڵایه‌تی گیانیان له‌ده‌ستداوه‌و 3که‌سی تریش بریندارن.
به گوێره‌ی زانیارییه‌کانی زاگرۆس پۆست له ماوه‌ی شه‌وی یه‌کشه‌مه له سه‌ر دووشه‌مه‌و رۆژی دووشه‌مه، رووداوێکی هاتوچۆ له نێوان دوو ئۆتۆمبێلی جۆری پرایدو 3F له سه‌ر رێگه‌ی نه‌ڵاس روویداوه‌و به هۆیه‌وه دوو هاوڵاتی به ناو‌کانی محه‌مه‌د و ئومید گیانیان له ده‌ستداوه، هه‌روه‌ها دوو هاوڵاتیی تریش که سه‌رنشینی 3F ه‌که بوون به برینداری گوازراونه‌ته‌وه بۆ نه‌خۆشخانه . تا ئێستا هۆکاری رووداوه‌که نه‌زانراوه، به‌ڵام ده‌وترێت رێگه‌ی نه‌ڵاس مه‌ترسیی بۆ رووداوی هاتوچۆ زۆره.
له لایه‌کی تره‌وه دوێنێ دووشه‌مه به هۆی کێشه‌یه‌کی کۆمه‌ڵایه‌تی شه‌ڕ له نێوان چه‌ند هاوڵاتییه‌ک که ده‌وترێت خزمی یه‌کتر بوون دروست بووه‌و به هۆی دروستبوونی ته‌قه له نێوانیان لاوێک به ناوی رێبوار گیانی له ده‌ستداوه‌و که‌سێکی تریش بریندار بووه. ئه‌و رووداوه له گه‌ڕه‌کی ماره‌غانی بووه‌و جۆری ئه‌و چه‌که‌ی ته‌قه‌ی پێکراوه نه‌زانراوه.
