زاگرۆس پۆست
گۆڕێكی بەكۆمەڵی لە باكووری خۆرئاوای شاری موسڵ دۆزرایەوە كە 400 تەرمی تێدایە.
بە پێی هەواڵی سۆمەریە نیوز “ئەمڕۆ دانیشتوانی شارۆچەكەی ئحمیدات كە 35 كیلۆمەتر لە باكووری خۆرئاوای موسڵەوەیە، گۆڕێكی بەكۆمەڵیان دۆزیوەتەوە”.
دەوترێ گۆڕە بەكۆمەڵەكە روفاتی 400 كەسی تێدایە كە ناسنامەكانیان نەزانراوە.
هەروەها هەواڵەكە باس لەوە دەكات كە، ئەو روفاتانەی لە گۆڕەكەدا دۆزراونەتەوە لە ماوەی رابردوودا بە فیشەك كوژراون”، پێشبینیشی كرد كە تەرمی زیندانیان و كارمەندانی گرتووخانەی بادوش بن.
جێگای ئاماژەیە، رۆژی 25ی مانگی رابردوو كۆمسیۆنی باڵای مافی مرۆڤی سەر بە نەتەوە یەكگرتووەكان، ئاشكرایكرد كە لە مانگی رابردوودا رێكخراوی دەوڵەتی ئیسلامی ناسراو بە داعش نزیكەی 670 زیندانی گرتووخانەی بادوش كوشتووە.
