زاگرۆس پۆست
لە ماوەی رۆژانی رابردوودا ھێزە ئەمنیەتیەکەنی رژیم لە شاری بانە دەستیان داوەتە رەشبگیری و لانیکەم ٨ لاوی خەڵکی ئەو شارەیان دەستگیر و بۆ شوێنێکی نادیار گواستووەتەوە.
بەرەبەیانی رۆژی یەکشەممە ٧ی مانگی گوڵان، سێ هاووڵاتیی خەڵکی گوندی”بلەسەن”ی بانە بە ناوەکانی “بێستوون ئەحمەدپوور” و ” فەرهاد ئەحمەد پوور” کوڕی عەبدوڵا کە پێکەوە برا بوون و “هادی ئەحمەدپوور” کە ئامۆزای ئەو دوو کەسەیە، لە لایەن هێزەکانی ئیدارەی ئیتلاعاتی بانە بە تۆمەتی ھاوکاریی لەگەڵ حزبە کوردستانیەکان دەستگیر و راپێچی شوێنێکی نادیار کراون.
ھەر لە ھەمان رۆژدا ھێزەکانی رژیم ھێرش دەکەنە ماڵ ھاوڵاتیەکی دیکە بە ناوی یوسف ئەحمەدی ٣٥ ساڵە و خەڵکی ئاوایی “ئۆغان”ی بانە و بە تۆمەتی ھاوکاریی حزبێکی کوردی ھەوڵی دەستگیرکردنی دەدەن، بەڵام لەگەڵ بەرەنگاریی و ھاڵاتنی ناوبراو بەرەوڕوو دەبنەوە و بە بێ ھێچ ئاگادار کردنەوەیەک تەقەی لێ دەکەن و پای بریندار دەبێت و بە بێ سەرنجدان بە دۆخی نالەباری ناوبراو، دەستگیری دەکەن.
لە لایەکی دیکەوە ھێزەکانی رژیم رۆژی شەممە ٦ی گوڵان، ٣ برای دیکە خەڵکی بانە بە ناوەکانی خەلیل کەریمی، کەریم کەریمی و بارزان کەریمی کوڕی ساڵەح بە تۆمەتێکی ھاوشێوە دەستگیر کردووە.
ھێزەکانی رژیم لە درێژەی ئەم راودوونان و دەستگیرکردنە ھەڕەمەکیانەدا ھاوڵاتیەکی دیکەی بانەیی بە ناوی “ئیدریس کەریم زادە”شیان دەستگیر کردووە.
