زاگرۆس پۆست
زارا محەممەدی مامۆستای زمانی کوردی و ئەندامی دەستەی بەڕێوەبەریی ئەنجومەنی فەرهەنگی-کۆمەڵایەتی” نۆژین” نزیک بە دوو مانگ لە زینداندایە و چارەنووسی نادیارە.
زاگرۆس پۆست؛ ڕۆژی پێنجشەممە ڕێکەوتی ٢ی جۆزەردان، “زارا محەمەدی”، “ئیدریس مینبەری” و “ڕێبوار مینبەری”، ئەندامانی دەستەی بەڕێوەبەرەیی ئەنجومەنی “نۆژین” لەلایەن هێزەکانی ئیتلاعاتی ڕژیمەوە دەستبەسەر کران و گوازرانەوە بۆ گرتووخانە. دوای ئەزیەت و ئازاری زۆر لە لایەن هێزەکانی ڕژیمەوە لەسەر ئەو سێ چالاکە، “ئێدریس مینبەری” و “ڕێبوار مینبەری” بە دانانی بارمتە بەشێوەی کاتی ئازاد کران، بەڵام زارا محەمەدی ئێستاش لەژێر گوشارەکانی هێزەکانی ئیتلاعاتی ڕژیم دایە و چارەنووسی ناڕوونە.
بنە ماڵە و لایەنگرانی کلتوور و زمانی کوردی و هەروەها ئەندامانی ئەنجومەنی “نۆژین” بۆ پشتیوانی خۆیان لە “زارا محەمەدی”، چەندین جار هەوڵیان داوە کە ناوبراو ببینن و لە بار ودۆخی ناوبراو ئاگادار بن بەڵام لە لایەن هێزەکانی ئیتلاعاتەوە بەرگرییان لێکراوە.
سەرچاوەیەکی ئاگادار بە زاگرۆس پۆستی ڕایگەیاند، “زارامحەمەدی” لە باری جەستەییەوە نالەبارە و و لەژێر ئازار دایە و بەرپرسان بۆ چارەسەری پزیشکی هیچ هەوڵێکی بۆ نادەن.
جێگای ئاماژەیە، کە دوای دەستبەسەری ئەو سێ ئەندامەی “نۆژین”، دوو ئەندام و چالاکی ئەو ئەنجومەنە بە ناوەکانی ” سیروان ئیبراهیمی” بەر پرسی لقی ئەنجوومەنی “نۆژین” لە شاری کامیاران و” منەت ڕەحامنی” لەلایەن هێزەکانی ئیتلاعاتەوە دەستبەسەر کراون و گوازراونەتەو بۆ زیندان و چارەنووسیان نادیارە.
