زاگرۆس پۆست
هێزەکانی سپای پاسدارانی ڕژیم لە شاخی “سیاکێو” لە سنووری “کێلەشین” سەربە شاری شنۆ کاروانێکی کۆڵبەرانیان داوەتە بەردەسڕێژی گوللە و لە ئاکامدا دوو کۆڵبەر بریندار بوون.
بەپێی هەواڵی گەیشتوو بەئاژانسی هەواڵدەری زاگرۆس پۆست؛ ئێوارەی دووشەممە ١٧ی پووشپەڕ هێزە چەکدارەکانی ڕژیم لە سنووری شنۆ و سیدەکانی هەرێمی کوردستان، تەقەیان لە کاروانێکی کۆڵبەران کردووە و دوو کۆڵبەر بە ناوەکانی “سامان سوور” خەڵکی مەهاباد و “غەریب عەلیزادە” خەڵکی پیرانشار بە قورسی بریندار بووون.
سەر چاوەیەکی ئاگادار بە زاگرۆس پۆستی ڕاگەیاند کە، هێزەکانی چەکدارەکانی ڕژیم بە بێ ئاگادار کردنەوە و لە پشتەوە تەقەیان لەو دوو کۆڵبەرە کردووە و بریندار بوونە.
ئەو دوو کۆڵبەرە کوردە بۆ چارەسەری پزیشکی ڕەوانەی نەخۆشخانەی “سۆران” لە هەرێمی کوردستان کراون.
ڕژیمی ئیسلامی ئێران لەبری ئەوەی کە بۆ ئەو کەسانەی کە کاری سەر سنوور و کۆڵبەری دەکەن و بە جەستەی لاواز و بێ گوشتی خۆیان سەرقاڵی کاری کۆڵبەرین، کار و پیشەی شێاو و گونجاویان بۆ دابین بکات،دەیاندەنە بەر دەسڕێژی گوللە و برینداریان دەکەن یان گیانیان لێ دەستێنێ و زۆر جاریش بێ‌حورمەتی بە تەرمەکانیان دەکات و بۆ ماوەیەکی زۆر رادەستی بنەماڵەکانیان ناکاتەوە.
