زاگرۆس پۆست
شەوی ڕابردوو لە نزیکی یەکێک لە گوندەکانی دەورووبەری شاری بۆکان سەر بە پارێزگای ورمێ، تێکهەڵچوونێک لە نێوان هێزەکانی سەر بە سپا و کەسانی نەناسراوەوە سەری هەڵدا.
ڕاپۆڕتنێری “زاگرۆس پۆست” لە شاری بۆکان ڕایگەیاندووە کە ؛ “بەرەبەیانی ڕۆژی شەممە ڕێکەوتی ١٦ی پووشپەڕ، لە چیاکانی دەورووبەری گوندی “دەروێشان” لە نێوان هێزەکانی سەر بە سپا و کەسانی نەناسراوەوە شەڕ و پێکدادان سەڕی هەڵداوە و لە کۆتایشدا لانیکەم ٤ کەس لە هێزەکانی سپا بە تووندی بریندار بوون و بۆ ناوەندی دەرمانی شاری بۆکان گوازراونەتەوە و دوو کەسیش لە ئەندامانی سپا کوژراون”.
ئەگەری ئەوە لە ئارادایە کە ئەم پێکدادانە لە لایەن تیمێک لە پێشمەرگەکانی کوردستان و هێزەکانی سپا سەری هەڵدابێت.
تاکوو ئێستا، هیچ لایەن و حیزبێکی سیاسی بەرپرسایەتی ئەم تێکهەڵچوونەی بە ئەستوو نەگرتووە و هەروەها هیچ ماڵپەڕ و لایەنێکی سەر بە ڕژیمیش باسی لە چۆنییەتی ئەم شەڕ و ئاڵۆزیانەی ڕۆژی شەممە نەکردووە.
