هه‌ینی 22 تشرینی دووه‌م 2019
ماڵەوە / وتار / خەسارێکی گەورە یان دەرکەوتنی پشکۆیەکی نەمر؟ / نەوید مێهراوەر

خەسارێکی گەورە یان دەرکەوتنی پشکۆیەکی نەمر؟ / نەوید مێهراوەر

مەرگی ناوادەی کورشی بەخشەندە تێکوشەری خەباتی یەکسانیخوازی کوردستان و یەکێک لە پێشڕەوانی خەباتی کرێکاری لە ئێران چەند خاڵێکی بەرجەستە کردو هێندێ وانەی وێنا کرد کە پێویستە ئەو لایەن و مەیلانەی کە خۆیان بە چەپ دەزانن و ئەیانەوێت لە کوردستانی رۆژهەڵات دا خەبات بکەن دەرسی لێوەربگرن و بیکەن بە چرای رووناکی بەخشی دەستیان، تا هەورازو نشێوەکانی ئەم سەردەمەی خەباتی چەپ و یەکسانیخۆازی پێ تێپەڕێنن.

 

ئەم رووداوە پەیامێکیشی ئاراستەی ئەو دەستە لە رۆشنبیران کرد کە خێرا بەڵێن بەو گووتارە بەناو چەپانە دەدەن کە هێزی سەربازیی و ئیمکاناتی لە رادەبەدەر زاڵی کردوەو سەرلەبەری لە گەڵ دیمۆکراسی و مافی خەڵکی چەوساوەو کرێکاران نامۆیەو، لە لایەکی تر جیاوازیی گوتاری چەپی راستەقینەی لە گەڵ ئەو جۆرە لە چەپ کە لە باکووری کوردستان دەور دەگێڕێ و لە گەڵ ئەوچەپەی کە لە باشوور بوونی هەیە نیشان دا.

 

ئەگەر هێرشی کۆماری ئیسلامی بۆ سەر کوردستان و داگیرکردنی بۆ زیاتر لە سێ دەیە توانیویە حیزبە بەرهەڵەستکارەکانی تا رادەیەک پاشەکشە پێ بکات و دەستیان لە بەستێنی راستەقینەی خۆیان ببڕێت و لە سەر کەمڕەنگ کردنەوەی گوتاریان لە نێۆ کۆمەڵگای کوردستاندا کاریگەری هەبێت، یان بە شێوەگەلێک ئەم دوورییە وای کردبێت کە حیزبەکان لە ناخەوە هەست بە لێدانی دڵی کۆمەڵگا نەکەن و جاروبار سازی ناسازێک لێدەن کە لە گەڵ پراکتیکی رابردووی خۆیشیان، واتا ئەو سەردەمەی کە حیزبی گەڕەک و کۆڵانەکانی شاری خۆیان بوون نامۆبێت، بەڵام ئەو گوتارە جۆرێک پراکتیزە کراوەو کاریگەری خۆێ وەها لە کوردستان داناوە کە رەگی لە ناخی کۆمەڵگا رۆچووەو پشکۆیەکە بە هیچ سازێکی ناساز یان تێوری رووخاوو نامۆ بە کۆمەڵگا ناکوژێتەوە تا ئەو کاتەی کە ئامانجی خۆی دەههنگیۆی، ئەویش هیچ نیە جگە لە بەختەوەری و ژیانێکی یەکسان و ئارام بۆ خەڵکی کوردستان.

 

بەشداری بەرینی خەڵک لە ناشتنی تەرمی کورش بەخشەندەو ئاڵاندنی تەرمەکەی لە ئاڵای سوور و خۆێندی سروودی ئەنتێرناسیوناڵ لە سەر گلکۆکەی دوور لە کاریگەری داعشیزمی شیعەو سونە، ئەو دیمەنەی وێنا کرد کە: یەکەم، گوتاری یەکسانیخۆازی لە کوردستان دا هێشتا گوتاری زاڵی خوازراوی جەماوەرە. دووەم، لە باتی ئاڵای ئەم حێزب و ئەو حێزب و بژی فڵان سەرۆک و…. کە گوتاری عەشایری و کاریزماپەروەرییە سروودی ئەنتێرناسێوناڵ کە سروودی هاوپشتی بەشمەینەتان و چەوساوەکانی جیهانە خۆێندرا. ئەم کردوەو هەڵسوکەوتە تەنانەت لە دامەزرێنەرانی گوتارەکەیش مۆدێرنترو دەستلەملانتر بوو لە گەڵ جەماوەرو کۆمەڵگا. ئەمجۆرە ئەسپەردەکردنە بە سروودو ئاڵای سوور لە رووانگەی دەسەڵاتدارانەوە تاوانەو لە روانگەی پیاوانی ئایینیشەوە کوفر دێتە ئەژمار، بەڵام بینیمان بە بێ ئەوە بێڕێزی بە هیچ باوەرو ئایینێک بکات بە چ شکۆیەکەوە بەڕێوە چوو.

 

ئەم رێورەسمە جیاوازی هەڵسوکەوتی چەپ بوو لە رۆژهەڵات لە گەل چەپی باکوورو باشووری کوردستان و ئەو دیمەنی وێنا کرد کە بۆ کۆکردنەوەی جەماوەر، پراکتیک و خۆبەخت کردن لە گەڵ تێگەیشتن لە هەلومەرج گرنگە نەک هاوڕەنگ و هاودەنگ بوون لە گەل ئەو بۆنەو رووداوانەی کە لە ئەشکەوتەوە سەرچاوەیان گرتوە، ئەم گوتارە پێمان دەڵێت پیرۆزبایی جەژنەکانی رەمەزان و قوربان، سەرخۆشی و هاودەردی لە گەڵ عاشوورا و تاسووعاچیەکان ئەرکی چەپ نیەو ئەو کارانە پتر لە گوتاری پیاوە ئایینیەکان لە کۆمەڵگا کاریگەر دەبێت و تەنیا بەستێن بۆ ئیرتجاع و دواکەوتووی ساز دەکات. بە بڕۆای من مەرگی ئەم تێکۆشەرە ماندوونەناسە لە گەڵ ئەوەدا کە بۆ بزووتنەوەی یەکسانیخوازی لە کوردستان و ئێران خەسارێکی گەورەو گوورچک بڕبوو گوتاری خوازاراوی خەڵکی وەزاڵەهاتوو لە ستەمیشی وێناکرد.

 

یادی بەرزو رێگای بەردەوام.

 

بابەتی هاوپۆل

بورژوازی کورد از نگاه حکمتیست و جنبش دموکراتیک مردم کوردستان / مام رحمان سقز

بورژوازی اصطلاحی درمفعوم سیاسی و تاریخی آن به معنی طبقه حاکم که ابزار تولید را …