سێ شه‌ممه‌ 29 ئه‌یلول 2020
ماڵەوە / سیاسی / قاسم سولەیمانی سەبارەت بە بارزانی پەیامیكێ بە یەكێتی و گۆڕان گەیاندووە

قاسم سولەیمانی سەبارەت بە بارزانی پەیامیكێ بە یەكێتی و گۆڕان گەیاندووە

قاسم سولەیمانی بە هێرۆ ئیبر‌اهیم ئەحمەد و نەوشیروان مستەفای وتووە “لەو بڕوایەداین کە پێویستە مەسعود بارزانی وەکو سەرۆکی هەرێمی کوردستان بمێنێتەوە”. فەرماندەی هێزی قودس-ی سوپای پاسدارانی ئێران، کە چەند رۆژێک بە سەردان لەنێوان هەولێر و سلێمانی هاتوچۆی دەکرد، لەگەڵ سەرکردەکانی هەریەکە لە یەکێتی و گۆڕان و پارتی کۆبووەتەوە و هەڵوێستی دەوڵەتی ئێرانی سەبارەت بە کێشەی سەرۆکایەتیی هەرێمی کوردستان پێڕاگەیاندوون.

سەرچاوەیەکی ئاگاداری کۆبوونەوەکان لە مەکتەبی سیاسیی یەکێتی بە تۆڕی میدیایی رووداوی راگەیاندووه: “قاسم سولەیمانی لە چەند رۆژی رابردوودا لەگەڵ هەریەکە لە هێرۆ ئیبراهیم ئەحمەد و کۆسرەت رەسووڵ و بەرهەم ساڵح، هەروەها لەگەڵ نەوشیروان مستەفاش کۆبووەوە و پێیڕاگەیاندن کە کۆماری ئیسلامیی ئێران لەگەڵ مانەوەی بارزانیدایە لە پۆستی سەرۆکی هەرێمی کوردستان”.

سەرچاوەکەی رووداو لە مەکتەبی سیاسیی یەکێتی ئەوەشی ئاشکراکرد کە سولەیمانی بە سەرکردەکانی یەکێتی و گۆڕانی وتووە: “کاتی ئەوە نییە هەرێمی کوردستان بە قەیرانی وەکو ئەوەی سەرۆکایەتیی هەرێمی کوردستانەوە سەرقاڵ بکرێت و پێویستە هەموو تواناکان یەکبخرێن بۆ شەڕی دژی داعش و ئەو تەحەدییانەی دیکە کە لەبەردەم هەرێمی کوردستاندان. چونکە ناوچەکە بەگشتی پێویستی بە ئارامییە و ئێرانیش لەگەڵ ئەو ئارامییەدایە”. هەروەها سولەیمانی گوتوویەتی: “راست نییە کەسایەتییەکی وەکو مەسعود بارزانی بشکێندرێت و بخرێتە نێو ئەو جۆرە گەنگەشانەوە کە ئێستا لەسەر پرسی سەرۆکایەتیی هەرێمی کوردستان دروستکراوە”.

بەپێی زانیارییەکانی رووداو سولەیمانی دوو جار، بەر لە چوونە سلێمانی و دوای گەڕانەوەی، سەردانی هەولێری کردووە و لەگەڵ هەریەکە لە مەسعود بارزانی، سەرۆکی هەرێمی کوردستان و نێچیرڤان بارزانی، سەرۆکی حکومەتی هەرێمی کوردستان کۆبووەتەوە. لەو سەردانانەدا سولەیمانی هەمان هەڵوێست کە بە سەرکردایەتیی یەکێتی و گۆڕانی راگەیاندووە، بۆ هەردوو بارزانیشی دووپاتکردووەتەوە.

حەسەن باوەفا، جێگری سەرکۆنسوڵی گشتیی کۆماری ئیسلامیی ئێران، لەبارەی سەردانەکەی سولەیمانی بۆ هەرێمی کوردستان، بە هەفتەنامەی (رووداو)ی راگەیاندووە: “ئاغای سولەیمانی کە لەگەڵ بەرپرسانی هەرێمی کوردستان کۆدەبێتەوە، باسی مەسەلەی ئاسایشی ناوچەکە دەکات، چونکە دوژمنانی ئێمە ئاسایشی ناوچەکەیان ناوێت”.

سەبارەت بە کێشەی سەرۆکایەتیی هەرێمی کوردستانیش، باوەفا هەڵوێستی دەوڵەتەکەی روونکردووەتەوە و رایگەیاندووە: “کێشەی سەرۆکایەتیی هەرێمی کوردستان کێشەیەکی نێوخۆییە و دەبێ لە نێوخۆی هەرێمی کوردستان چارەسەربکرێت، بەڵام بەشێوەیەکی گشتی ئێمە پشتگیری لە هەموو لایەنەکان دەکەین”.

قاسم سولەیمانی کێیە؟

 فەرماندەی هێزی قودس-ی سوپای پاسدارانی ئێرانە.

* یەکێک بووە لە فەرماندەکانی شەڕی نێوان ئێران و عێراق لە ساڵانی هەشتا.

* بەهۆی ئازایەتییەوە، ئایەتوڵڵا خامنەیی ناونیشانی “شەهیدی زیندوو”ی پێداوە.

* سەرپەرشتیی پڕچەککردن و بەهێزکردنی حیزبوڵڵای لوبنانی کردووە.

* لە شەڕی ئەفغانستان لەدژی ئەمریکا و هاوپەیمانانی رۆڵی سەرەکیی گێڕاوە.

* لە عێراق لایەنە سیاسییەکان وەکو “فەرمانڕەوای راستەقینەی وڵات” دەیناسن.

* حەزی لە دەرکەوتن لە میدیاکاندا نییە، بەڵام لە شەڕی دژی داعش لە زۆر شوێنی عێراق لەگەڵ چەکدارانی حەشدی شەعبی و پێشمەرگە و سوپای پاسداران رێگەیداوە بە مۆبایل وێنەی بگیرێت.

* تەمەنی 51 ساڵە و خێزاندارە. * بەرلەوەی بێتە ناو سوپای پاسداران کاری بیناسازیی کردووە.

بابەتی هاوپۆل

کامران ساختمانگر جهت تحمل حبس احضار شد

روز دوشنبه ۷ مهرماه، کامران ساختمانگر فعال کارگری جهت تحمل حبس به شعبه‌ اجرای احکام …