زاگرۆس پۆست
هاووڵاتییەكی خەڵكی دهۆك لە باشووری كوردستان، لە ناوچە سنوورییەكانی ڕۆژهەڵاتی كوردستان كەوتە سەر مینە چێنراوەكان و گیانی لەدەست داوە.
بەپێی هەواڵی باسنیوز، چەند رۆژ لەمەوبەر پیاوێك بە ناوی “پشتیوان ڕەمەزان” تەمەن 53 ساڵ و خەڵكی شاری دهۆك كە شۆفێری تەنكەری گواستنەوەی سووتەمەنی بووە، لە ناوچە سنوورییەكانی مەریوان گیانی لەدەست داوە.
ئەو هاووڵاتییە كوردە تەنكەری سووتەمەنی پێ بووە و بەهۆی تێكچوونی تانكرەكەی ویستوویەتی بە ناوچە سنوورییەكاندا بگەڕێتەوە باشووری كوردستان، تووشی ئەو ڕووداوە بووە.
پشتیوان ڕەمەزان لە ناوچە سنوورییەكانی شاری مەریوان و شلێر تووشی رووداوی تەقینەوەی مین بووە.
شایانی باسە، ئێستاكە زیاتر لە 20 میلیۆن مینی چێنراو لە 5 پارێزگای ورمێ، سنە، كرماشان، ئیلام و خوزستان بوونی هەیە كە لە سەردەمی شەڕی نێوان ئێران و عێراق لە لایەن كۆماری ئیسلامی ئێرانەوە چێنراوە و ساڵانە بە دەیان قوربانیی لێدەكەوێتەوە.
