زاگرۆس پۆست
ئیدارەی پاراستنی ژینگەی شاری نەغەدە باس لە كۆچی زیاتر لە 3 هەزار قازی بۆر بەرەو تاڵاوەكانی شاری نەغەدە كردووە.
بە پێی راپۆرتی شنۆباس، بەرپرسی پاراستنی ژینگەی شاری نەغەدە رایگەیاندووە: لە درێژەی كۆچ لە ناوچە باشوورییەكانەوە بەرەو ناوچە باكوورییەكان بە مەبەستی دۆزینەوەی خواردن، پشوودان و هێز گرتنەوە زیاتر لە 3 هەزار قازی بۆر روویان لە تاڵاوەكانی شاری نەغەدە كردووە.
فەرامەرز سەفەری هەروەها دەڵێ: یەكەم گرووپی قازە بۆرەكان كە رێژەیان 200 پەلەوەر بووە، چوونەتە نێو تاڵاوەكانی شاری نەغەدە و پێشبینی دەكرێ لە ماوەی رۆژانی داهاتوو، بینەری زۆرتر بوونی رێژەی ئەو باڵندانە لە ناوچەكەدا بین.
قاز لەو باڵندە كۆچەرانەیە، كە هەموو ساڵێ لە سەروبەندی بەهار و كۆتاییەكانی هاوین بە مەبەستی بەهێز كردنەوەی خۆی و بە مەبەستی درێژەدان بە ژیان، ماوەیەك لە تاڵاوەكانی نەغەدە، حەسەنلو(ئاغ قەڵا)، یادگارلو، دەرگە سەنگی و كەنارەكانی باشووری پاركی میللی دەریاچەی ورمێ دەژین و شكۆ و جوانیەكی تایبەت بە ناوچەكە دەبەخشن.
جێگای ئاماژەیە، ژینگەی ئەو پەلەوەرە جوانە كەنارەكانی باكووری ئوروپا و سیبری روسیە بوو، كە لە كۆتاییەكانی مانگی خەرمانان بەرەو ناوچە باشوورییەكان كۆچیان كردووە و سەرەتاكانی بەهار بەرەو شوێنی سەرەكی ژیانی خۆیان دەگەڕێنەوە.
