زاگرۆس پۆست
باڵیۆزی عەرەبستانی سعودی لە سویس ئاشكرای كرد، بەڕێوەبەرایەتیی هاتوچۆی سویس بڕیارێكی لە دژی هاووڵاتییانی عەرەبستان دەركردووە و بڕیاری داوە، ڕێگە بە شۆفێری كردنی عەرەبستانیەكان نەدات.
میدیاكانی عەرەبستان لە زاری باڵیۆزی وڵاتەكەیانەوە لە سویس بڵاویان كردەوە، بە پێی تازەترین بڕیاری بەڕێوەبەرایەتیی هاتوچۆی سویس، دەبێت سەرجەم ئەو كەسانەی سەردانی سویس دەكەن، بە تایبەتیش گەشتیاران، مۆڵەتی شۆفێرییان بۆ زمانی سویسی وەربگێڕن، ئەگینا ڕێگە بە شۆفێری كردنیان نادرێت.
باڵیۆزی عەرەبستان ئەوەشی ئاشكرا كردووە، كە بەڕێوەبەرایەتیی هاتوچۆی سویس لێكۆڵینەوەی تەواوی لە هۆكاری ڕووداوەكانی هاتوچۆ لە سویس كردووە و بۆی دەركردووە، هۆكاری زۆربەی ڕووداوەكان، ئەو ژنە عەرەبستانیانەن، كە مۆڵەتی شۆفێرییان ساختە كردووە، چونكە لە عەرەبستان ژنان مافی شۆفێرییان نییە و ژنانی عەرەبستانیش بۆ شۆفێری كردن لە سویس، ناچارن مۆڵەتی شۆفێری ساختە بكەن.
