زاگرۆس پۆست
بنەماڵەی گیراوێكی سیاسیی كورد ڕایدەگەیەنن كە بڕیارە حوكمی ئێعدامی ئەو گیراوە تا لە چەند هەفتەی داهاتوودا بەڕێوە بچێت و داواش لە كۆڕ و كۆمەڵە مرۆڤدۆستەكان دەكەن تا بە هانای رۆڵەكەیانەوە بێن.
یەكێك لە ئەندامانی بنەماڵەی گیراوی سیاسیی كورد بەختیار مێعماری ڕاگەیاندووە كە بڕیاری جێبەجێكردنی حوكمی ئێعدامی ناوبراو، لە دیوانی باڵای دەوڵەتەوە ڕەوانەی دادگوستەریی پارێزگەی سنە كراوە و ئەگەری ئێعدام كردنی لە داهاتوویەكی نزیكدا بە دوور لە چاوەڕوانی نەی.
بەختیار مێعماری تەمەن ٣٧ ساڵ و خەڵكی شاری مەریوان، لە ١٣ی گەلاوێژی ساڵی ٨٩ی هەتاویدا لەلایەن هێزەكانی ئیدارەی ئیتلاعاتی مەریوانەوە دەستگیر كرا و لە لایەن دادگەوە، بە تۆمەتی “كوشتنی دوو شارۆمەند و ئەندامبوون لە حیزبێكی كوردیدا” حوكمی ئێعدامی بۆ بڕایەوە.
حوكمی ئێعدامی ئەو زیندانیە كوردە هاوكات لەگەڵ حوكمی ئێعدامی زانیار و لوقمان مورادی و هەژیر ئیبراهیمی، لە لایەن وەزارەتی ئیتلاعاتی كۆماری ئیسلامیی ئێران، لە مانگی گەلاوێژی ساڵی ٩١ی هەتاویدا ئاشكرا كرا.
