زاگرۆس پۆست
له ماوهی یه‌ک حه‌فته‌ی رابردوودا که‌مپه‌ینی کۆکردنه‌وه‌ی یارمه‌تی بۆ کۆبانی‌و شنگال له زۆربه‌ی شاره‌کانی رۆژهه‌ڵات رێژه‌یه‌کی به‌رچاو له پێداویستییه سه‌ر‌ه‌تاییه‌کانی بۆ خه‌ڵکی ئه‌و ناوچانه دابین کردو تا ئێستاش شاری مه‌ریوان به کۆکردنه‌وه‌ی بڕی 150ملیۆن تمه‌ن یارمه‌تی سه‌رتۆپی شاره‌کانی رۆژهه‌ڵاته.
به گوێره‌ی زانیارییه‌کانی زاگرۆس پۆست له رۆژهه‌ڵاته‌وه، تا ئێستاو له ماوهی سێ رۆژ کۆکردنه‌وه‌ی یارمه‌تیی سه‌ره‌تایی بۆ لێقه‌وماوانی شنگال له شاره‌کانی رۆژهه‌ڵاتی کوردستان، له مه‌ریوان لانیکه‌م بڕی 150 ملیۆن تمه‌ن پاره‌و پێداویستیی سه‌ره‌تایی کۆکراوه‌ته‌وه‌و به‌وشێوه‌یه مه‌ریوان تا ئێستا پێشه‌نگی شاره‌کانی رۆژهه‌ڵاتی له به هاناوه‌چوونی شنگال.
به گوێره‌ی سه‌رچاوه‌که یارمه‌تییه خه‌ڵکییه‌کان له مه‌ریوان له سێ شوێنی سه‌ره‌کی چوارڕای شه‌بڕه‌نگ، مه‌یدانی دوانزه سواره‌و مه‌یدانی باوه‌ڕه‌شی کۆئه‌کرێته‌وه‌و بۆ ماوهی یه‌ک حه‌فته به‌رده‌وام ئه‌بێت.
زۆربه‌ی یارمه‌تییه‌کان برێتییه له پۆشاکی مناڵان، شیر وشک، برنج، په‌تو، ئاو مه‌عده‌نیی یه‌کبار مه‌سره‌ف‌و شامپ‌و سابون‌و هه‌ندێ پێداویستیی سه‌ره‌تایی تر، وه‌ک پێشتر سه‌رچاوه ئاگاداره‌کان له ناوه‌نده‌کانی ئاواره‌کان رایان گه‌یاندبوو.
