زاگرۆس پۆست
ئه‌مڕۆ 5ساڵ به سه‌ر گیانله‌ده‌ستدانی ‘کیانوش ئاسا’ خوێندکاری کوردی کرماشانی له ئاکامی خۆپیشاندانه‌کانی ساڵی 1388 تێپه‌ڕی‌و بڕیار بوو به‌و بۆنه‌وه رێز له یادی بگیرێت که ئیتلاعات له کرماشان پێشی پپێ گرت.
بەپێی راپۆرتی ئاژانسی هەواڵدەریی کوردپا، لە کاتێکدا بڕیاربوو رۆژی پێنج‌شەممەی رێکەوتی ٢٢ی جۆزەردان رێوڕەسمی پێنجەمین ساڵیادی کوژرانی کیانووش ئاسا چالاکی خوێندکاریی کورد، لە شاری کرماشان بەرێوە بچێت، لەلایەن ناوەندە ئەمنییەکانەوە پێشی پێگیرا.
سەرچاوەیەکی ئاگادار وێرای پشتڕاست کردنەوەی ئەم هەواڵە بە ئاژانسی کوردپای راگەیاند؛ رێوڕەسمی ساڵیادی کوژرانی کیانووش ئاسا لەلایەن کانوونی “باران”ی مەریوانەوە رێکخرابوو، کە ئەو رێوڕەسمە بەهۆی هەڕەشەی دەزگا ئیتلاعاتییەکانەوە هەڵوەشایەوە.
بڕیاربوو ژمارەیەک چالاکی مافی مرۆڤی وەک “ئەسرین محەمەدی”، کە ماوەیەک پێش ئێستا لە زیندان ئازادبوو، لەو رێوڕەسمی پێنجەمین ساڵیادی کوژرانی (کیانووش ئاسا)دا بەشدار بێت.
کیانووش ئاسا خوێندکاری کارناسیی باڵای ئەندازیاریی “شیمی” لە زانکۆی “عیلم و سەنعەت”ی تاران بوو، کە رێکەوتی ٢٥ی جۆزەردانی ساڵی ٨٨ی هەتاوی و لە ئەنجامی لە ئاڵۆزییەکانی دوای هەڵبژاردنی سەرکۆماریی لە ئێران، بە دەستی هێزە چەکدارەکانی حکوومەتی ئیسلامی لە تاران گیانی لێ ئەستێندرا.
