مەترسی بێكاربوونی کاسبکارانی کوردی سەر سنوور

ئەگەری ئەوە لە ئارادایە كە تا ماوەیەكی دیكە كۆڵبەران‌و كاسبكارانی سەر سنوور تووشی بێكاریی بن‌و ئەمەش دەگەڕێتەوە بۆ هەڕەشەی هێزەچەكدارەكانی سپا.

بە پێی ئەو هەواڵانەی كە بڵاو دەبنەوە پێدەچێت هێزەكانی سپای كۆماری ئیسلامیی تا ماوەیەكی دیكە بە بیانووی كۆنتڕۆڵكردنی بواری ئەمنیەتی سنوورەكان هێزێكی زۆر رابكێشنە ئەو شوێنانە‌و ئەمەش مەترسی بێكاربوونی سەدان‌و هەزاران كۆڵبەرو كاسبكاری كوردی لێدەكەوێتەوە كە لەو رێگەوە ژیانیان دابیندەكەن.

بە تایبەتی هێزەكانی سپا لە وەرزی گەرمادا‌و بە بیانووی ئەوەی سنوورەكانی ئەمنیەتیان نیە هەڵدەكوتنە سەر ئەو شوێنانە‌و تێیدا مۆڵگەكانی خۆیان دادەمەزرێنن‌و ئەمەش مەترسیەكی گەورەیە هەم بۆ بێكاربوونی سەدان كاسبكاری ئەو ناوچە سنووریانە‌و لە لایەكی دیكەشەوە ئەگەری تەقەكردن‌و كوژرانیان لە لایەن چەكدارانی سپاوە لێدەكرێت.