زاگرۆس پۆست
پاش داخران و پێشگیری لە چالاكیی چەند رۆنامەیەك لەلایەن دادگاكانی ئێرانەوە، 167 رۆژنامەنووس لەناوخۆ و دەرەوەی ئێران لە بەیاننامەیەكدا لە بەرانبەر داخرانی رۆژنامەكان و بەرتەسك بوونەوەی ئازادیی چاپەمەنی لە ئێران ناڕەزایەتییان دەربڕی.
لە ناوەڕۆكی ئەو بەیاننامەیەدا هاتووە و باس لە داخرانی دوو رۆژنامەی “مردم امروز” و “روزان” كراوە و واژۆكارانی ئەو بەیاننامەیە نووسیویانە: “راگەیەنەكان بە متمانەوە درێژە بەكاری خۆیان بدەن هەتا زەوق و ئەكتیڤی بۆ فەزای چاپەمەنی و رۆژنامەنووسیی ئێران بگەڕێتەوە هەتا راگەیەنەكان بتوانن بە كاری پیشەیی و پسپۆڕیی خۆیان هەواڵ ورووداوەكانی ئێران رووماڵ بكەن.”
لە بەشێكی تری بەیاننامەی ئەو 167 رۆژنامەنووسەكەدا هاتووە: “داخران و پێشگرتنی چالاكیی رۆژنامەكانی ئێران، مافی ئازادیی رادەربڕین، رووماڵی هەواڵ و زانیاری و ئەمنیەتی پیشەیی رۆژنامەنووسانی پێشێل كردووە و لە كۆتاییدا سیاسەت و هەڵسوكەوتی دامودەزگەكانی ئێرانیان لە بەرانبەر رۆژنامە و رۆژنامەنووسانی ئێرانی مەحكووم كردووە و خوازیاری كەش و دۆخێكی ئەكتیڤ و بەدوور لە كۆت و بەندی ئەمنین.
پاش هاتنە سەركاری حەسەن رۆحانی و دانی دروشم و بانگەشەی كرانەوەی فەزای سیاسی، فەرهەنگی و ئازادیی رادەربڕین، نەتەنیا بە كردەوە هەنگاوێك هەڵنەگیراوە، بەڵكوو فەزاكە بەرتەسكتر و ئەمنیەتی تر بووەتەوە.
بەپێ ئاماری رۆژنامەنووسان و ناوەندەكانی داكۆكیكاری رۆژنامەنووسان لە ئێران لە 8 ساڵەی دەوڵەتی “حەمەد خاتەمی” (1376_1384) هەتاویی لە ئێران نزیك بە 10 رۆژنامە و بڵاڤۆك لە ئێران داخراون، لە ماوەی 8 ساڵ سەركۆمارئیی ئەحمەدی نەژاددا (1384_1392) 46 رۆژنامە، گۆڤار و چاپەمەنی لە ئێران داخراون، یان پێش بە چالاكییان گیراوە كە تەنیا لە رۆژهەڵاتی كوردستان جیالە گۆڤارە خوێندكارییەكان زیاتر لە 15 حەفتەنامە و دوو حەفتەنامە و بڵاڤۆك داخران.
لە ماوەی زیاتر لە یەك ساڵی دەوڵەتی رۆحانیشدا بێجگەلە گۆڤارە خوێندكارییەكان 4 رۆژنامە بە فەرمی داخراون و پێش بە چالاكییان گیراوە.
بەپێی ئامارە نافەرمییەكان لە ماوەی 18 ساڵدا زیاتر لە 60 رۆژنامە و بڵاڤۆكی جۆراوجۆر لە ئێران داخراون.
