زاگرۆس پۆست
هیوا فولادی بەرپرسی ماڵپەڕی هەواڵنێریی شارنیوز رۆژی چوارشەممە بە هۆی سكاڵای هێزە ئینتزامییەكانی شاری سەقز دەستگیر و رەوانەی زیندانی ناوەندیی ئەو شارە كرا.
بە پێی هەواڵی ماڵپەری شارنیوز، سكاڵای هێزە ئینتزامیەكانی لەم رۆژنامەوانە بە هۆی بڵاو كردنەوەی بابەتی رەخنەگرانە لەسەر ماڵپەڕەكەی بووە.
هێزە ئینتزامیەكان و چەند دامەزراوەیەكی حكومەتی لە ماوەی چەند هەفتەی رابردوو بە سكاڵا و بەربەست سازكردن بوونەتە هۆی كێشە سازكردن لە پرۆسەی هەواڵنێریی ئەو ماڵپەڕە كە ناوەندەكەی لە شاری سەقزدایە و لە نیهایەتیشدا بەرپرسی ماڵپەڕەكەیان دەستگیر و رەوانەی زیندان كردووە.
هەروەها لە لایەكی دیكە خالید تەوەكولی كۆمەڵناس و چالاكی سیاسی شاری سەقزیش ئۆتۆمبیلەكەی كەوتە بەر دەستڕێژی گوللەی كەسانێكی نەناسراو كە تا ئێستا هۆكاری ئەو كردەوەیە و ئەنجامدەرانی نادیارە.
