زاگرۆس پۆست
هێزەكانی میحوەری قەرەتەپە هێرشێكی بەرفراوانیان بۆ پاككردنەوەی تەواوی ئەو گوندانەی كە ماون و لەلایەن داعشەوە كۆنترۆڵكرابوون ئەنجامداو توانیان ئاڵای كوردستان لەسەر چیای حەمرین هەڵبكەن.
رەحیم محەمەد سەرۆكی ئەنجومەنی شارەوانی قەرەتەپە كە لەگەڵ هێزەكانی پێشمەرگە بووە لەكاتی ئەنجامدانی ئەو هەڵمەتە راگەیاند: لەدوا نیوەرۆی دوێنێ یەكشەممە هێزەكانی پێشمەرگەی كوردستان بەفەرماندەیی مەردان چاوشین لەچەند قۆڵێكەوە هێرشیان كردە سەر 6 گوندی سنوری حەمرین كە تیرۆرستانی داعش ماوەی سێ مانگ دەبوو كۆنترۆڵیان كردبوون بەتەواوەتی و بەبێ ئەوەی هیچ بەرگریەكیان هەبێت ئەو گوندانە پاككرانەوەو چەكدارەكانی داعش هەڵهاتن.
ناوبراو رونشیكردەوە: ئەو گوندانە پێك هاتبوون لە ( شەرموغ ، برێهە ، جەعافرە ، جێ سات ، بن عێف ، حدیدی )، لە هەڵمەتەكەشدا هیچ زیانێك بەر هێزەكانی پێشمەرگە نەكەوتووەو لەوپەری ورە بەرزیدان.
هەروەها ئاماژەی بۆ ئەوەشكردووە كە: دوای كۆنتڕۆڵكردنەوەی ئەو گوندانە هێزەكانی پێشمەرگە پەلاماری داعشیان لەسنوری زنجیرە چیای حەمرین داوەو تێكیان شكاندوون و دوای ئەو سەركەوتنە گەورەیە ئاڵای كوردستان لەسەر چیای حەمرین هەڵكراو پێشمەرگە لەوێ جێگربووە.
