زاگرۆس پۆست
یكێك لە قاچاخچیەكان سەر بە گرووپی دەوڵەتی ئیسلامی ناسراو بە داعش بە بی بی سی راگەیاندووە، كە 3 خوشك و 9 منداڵەكەیان كە دانیشتووی بریتانیا بوون لە ماوەی هەفتەی رابردوو چوونەتە نێو داعش.
دەوترێ ئەندامێكی داعش لە سنووری توركیە و سوریە ئەو هەواڵەی پشت راست كردووەتەوە.
بە وتەی ئەو كەسە كە قاچاخچی بووە و بەرپرسیاریەتی هەندێ لە جووڵانەوەكانی داعش لە سنوورەكانی لە ئەستۆدایە، ئەندامانی ئەو بنەماڵەیە بۆ پەڕینەوە لە سنوور و چوون بۆ نێو سوریە، بوونەتە دوو گرووپ و گرووپی یەكەم چوارشەممە 27ی جۆزەردان و گرووپی دووهەم پێنجشەممە 28ی جۆزەردان چوونەتە نێو خاكی سوریە.
لە لایەكی دیكەوە بە پێی راپۆرتی ئێشپیگل ئانلاینی ئاڵمان، رێژەی ژنان و كچانێك كە لە ئاڵمانەوە دەڕۆنە نێو گرووپە جیهادیەكانی سوریە و عێراق لە حاڵی زیاد بووندایە و لە ساڵی 2015ی زایینی 700 هاوڵاتیی ئاڵمانی چوونەتە نێو داعش و لەو رێژەیە 100 كەسیان ژن بوون.
بە پێی ئاماری دامەزراوە ئەمنیەتیەكان، نزیكەی 225 كەس لەو داعشیانە گەڕاونەتەوە بۆ ئاڵمان و بەگشتی 7 هەزار و 700 ئیسلامی توندڕەو لە ئاڵمان بوونی هەیە.
