زاگرۆس پۆست
لە ماوەی دوو رۆژی رابردوو 21 كەس لە شارە جیاجیاكانی ئێران لە لایەن دام و دەزگا قەزایی و ئەمنیەتیەكانی كۆماری ئیسلامیەوە بە تۆمەتگەلێكی جیاواز لەسێدارە دراون.
بە پێی راپۆرتی سەرچاوەكانی مافی مرۆڤ، ئەمڕۆ چوارشەممە 30 مانگی گوڵان 8 كەس بە تاوانی ئەنجامدانی قەتڵ لە زیندانی رەجایی شاری كەرەج لە سێدارە دراون.
هەر ئەمڕۆ لە شارەكانی میناب و قوچان 2 كەس بە تاوانی قاچاخی مادەهۆشبەرەكان و ئەنجامدانی قەتڵ لە پێش چاوی خەڵك لەسێدارە دران و هاوڵاتییەكی بەلووچیش بە تاوانی قاچخی مادەهۆشەبەركان لە زیندانی ئەراك لەسێدارە درا.
هەورەها سەرلەبەیانی دوێنێ سێشەممە 29ی مانگی گوڵان 5 كەس لە زیندانی عادڵ ئابادی شیراز بە تاوانی ئەنجامدانی قەتڵ لەسێدارە دران كە تەمەنی یەكێك لە ئێعدام كراوەكان 18 ساڵ راگەیەندراوە.
لە هەمان رۆژدا كەسێكی دیكە لە شاری شیراز و لە پێش چاوی خەڵك تاوانی دەستدرێژیی سێكسی لەسێدارە درا و 4 كەسیش بە تاوانی قاچاخی مادەهۆشبەرەكان لە زیندانەكانی دلیجان و خومەینی سەر بە پارێزگای ئەراك ئێعدام كران.
جێگای وەبیرهێنانەوەیە، لە ماوەی 2 مانگی رابردوو بە ئاستێكی زۆر رێژەی ئێعدامی هاوڵاتییان لە زیندانیە جیاجیاكانی ئێران پەرەی سەندووە و بە پێی ئامارە كۆكراوەكانی “زاگرۆس پۆست”، لانیكەم 150 كەس لەم ماوەیەدا لە ئێران ئێعدام كراون.
