زاگرۆس پۆست
كۆماری خەڵقی چین لە درێژەی ئەو بەڵێنانەی كە شی جین پینگ سەرۆك كۆماری ئەو وڵاتە بۆ ئەنجامی چاكسازی دابووی، بە شێوەی رەسمی كار لە ئۆردوگاكانی كاری زۆرەملێیان كۆتایی پێهێنا.
هەواڵنێریی رەسمی چین شین هوا ئەمڕۆ شەممە 7ی بەفرانبار رایگەیاند، كۆمیتەی هەمیشەیی كۆنگرەی خەڵقی چین پێشنیاری هەڵوەشاندنەوەی بەڵگە‌و پرسە یاساییەكانی تایبەت بە ئۆردوگاكانی كاری زۆرەملێ كە بۆ بارهێنانەوە بەكار دەهێنران قبووڵكرد. هاوكات ئەو كۆمیتەیە پشتگریی لەو یاسایە كرد بە مەبەستی بوونی منداڵی زۆرتر بۆ بنەماڵەكان. رێكخراوی لێبوردنی نێونەتەوەیی كەمتر لە دوو هەفتە لەوەپێش لە راگەیاندنێكدا پرسیاری ئەوەی كردبوو، ئایا وەلانانی ئەو ئۆردوگایانە تەنیا بە مانای وەلانانی سیستەمێكی سەركوتگەر‌و دانانی سیستەمێكی نوێی داپڵۆسینە؟
رێكخراوی چاودێری مافی مرۆڤ خۆشحاڵیی خۆی بە بۆنەی هەڵوەشاندنەوەی ئۆردوگاكانی كاری زۆرەملێ لە چین دەربڕیی‌و هاوكات وتی، پێویستە چیدی ئەم سیستەمە بە گشتی وەلابنرێت.
