زاگرۆس پۆست
بەرپرسی كۆمیتەی ئێمدادی كۆماری ئیسلامی لە پارێزگای ورمێ دەڵێ: 2 هەزار منداڵی ژێر تەمەنی 6 ساڵ لە پارێزگای ورمێ ناسێندراون كە تووشی بەدخوراكی بوون و پێویستیان بە چارەسەریی و پێڕاگەیشتن هەیە.
“جەلال حسێن زادە” زیادی دەكات: ئەو منداڵانە بۆ دابین كردنی پێداویستیە خۆراكیەكانیان لە لایەن ئەو ناوەندە دەوڵەتیەوە 60 هەزار تمەنیان پێ دەدرێت و هەموو ئەو پارەیەش لە یارمەتیە خێرخوازانەكانی خەڵك كۆكراوەتەوە.
ئەو كاربەدەستە حكومەتیە لە درێژەدا دەڵێ: ساڵانە لە پارێزگای ورمێ 5 تا 6 هەزار نەفەر دەكەونە ژێر چەتری پشتیوانیی كۆمیتەی ئیمداد و لە لایەن ئەو ناوەندە حكومەتیەوە پشتیوانی دەكرێن.
شایانی باسە، وڵاتی ئێران یەكێك لە هەرە دەوڵەمەندترین وڵاتانی جیهان لە بواری سەرچاوە ژێر زەوینیەكانەوە و لە بواری نەوت و گاز پلەی دووهەمی جیهانی هەیە، بەڵام هەژاری تەنگی بە خەڵكی ئەو وڵاتە هەڵچنیوە و بە وتەی خودی كاربەدەستان ئێستاكە پتر لە 10% ی خەڵكی ئێران لە ژێر هێڵی هەژاریدان و هەر بەو بۆنەوە هەندێكیان روو دەكەنە كۆمیتەی ئیمداد بە مەبەستی وەرگرتنی پارەیەكی زۆر كەم لە مانگدا و ئەم كردەوەیەش بە چەشنێك لە ناو خەڵكدا بە خراپ سەیر دەكرێت، كە كەمتر كەسێك رووی ئەوەی هەیە باس لە وەرگرتنی وەها پارەیەك بكات.
