زاگرۆس پۆست
پەیوەندییە گشتیەكانی قەرارگای قودسی هێزی زەوینی سپای پاسدارانی كۆماری ئیسلامی رایگەیاند: 3 كەس لە ئەندامانی ئەو ناوەندە حكومەتیەی ئێران، لە تێكهەڵچوونێكی چەكداریی لە ناوچەی “سراوان”سەر بە پارێزگای سیستان و بەلوچستان كوژراون و هەر لەو پەیوەندەدا “جەیشولعەدل” لە گرووپە چەكدارییەكانی گەلی بەلوچ، كوژرانی ئەو 3 كەسەی گرتووەتە ئەستۆ.
بە پێی راپۆرتی سەرچاوەی هەواڵنێرییە حكومەتیەكانی ئێران، لە ئاكامی تێكهەڵچوونی چەكداریی لە سنووری باشووری رۆژهەڵاتی ئێران، 3 چەندامی سپای پاسداران بە ناوەكانی “سەرگوردی پاسدار ئەكبەر عەبدوڵڵانژاد، ستوان سێهەم پاسدار قودرەتوڵڵا ماندەنی و بەسیج نەسیری بەیات” لە هێزەكانی لەشكری نۆزدەی فەجری پارێزگای فارس، لە ئاكامی هێرشێكی چەكداریی كوژراون.
لاپەڕەی تۆڕی كۆمەڵایەتی عداڵەت نیوز سەر بە گرووپی “بزووتنەوەی جەیشولعەدل”ی سیستان و بەلوچستان، وێڕای لە ئەستۆ گرتنی كوژرانی ئەو 3 ئەندامەی سپای پاسداران، پیرۆزبایی لە هێزەكانی خۆی كردووە.
لە راگەیەندراوەكەی جەیشۆلعەدل راگەیەندراوە: ئەو تێكهەڵچوونە لە ناوچەی “كێوی سوور” (كوە سرخ) ئەنجامدراوە و لە ئاكامدا ئۆتۆمبیلێكی سپای پاسداران تێكشكێندراوە و ئۆتۆمبیلێكی دیكەش بە دەسكەوت وەرگیراوە.
