زاگرۆس پۆست
پۆلیسی دیالە دەڵێت: لە ئەشكەوتێكدا لە سنوری چیای حەمرین، دەستیان بەسەر ئەنبارێكی مادەی هۆشبەردا گرتوە، كە هی چەكدارانی داعش بووە.
جەمیل شەمەری، فەرماندەی پۆلیسی دیالە لەبەیاننامەیەكدا ڕایگەیاندووە كە: هێزە ئەمنیەتیەكان لە چیای حەمرین بە دوریی 50 كیلۆمەتر لە باكووری خۆرهەڵاتی بەعقوبە لەناو ئەشكەوتێكدا بڕێك مادەی هۆشبەریان دۆزیوەتەوە كە لە لایەن داعشەوە حەشار درابوو و دەرزی‌و حەبی جۆراوجۆریان تێدا بووە، كە دەبێتە هۆی بەرزكردنەوەی توانای بەرگەگرتن لە برسێتی‌و تینوێتی.
بە وتەی فەرماندەی پۆلیسی دیالە، چەكدارانی داعش 80%یان مادەی هۆشبەر بەكاردەهێنن بۆ ئەوەی بەرگەی ئەو بارودۆخە دژوارە بگرن كەتێیدا دەژین و هەروەها لە كاتی شەڕ و پێكدادانەكاندا ترس و دڵەڕاوكەیان نەمێنێ.
