زاگرۆس پۆست
بە وتەی كارناسانی ئێرانی گەشەی بەكارهێنانی “حەبی ترامادۆڵ، شیشە و ئەلكول” لە ئێران بە ئاستێكی بێ وێنە لە حاڵی پەرەسەندندایە و خەبات لەدژی مادەهۆشبەرە پیشەییەكان لە ئێران زۆر دژوارە.
سامان غەنی زادە لە دكتۆرەكانی ئەندامی رێكخراوی پزیشكی یاسایی ئێران وتوویەتی، رێژەی بەكارهێنانی مادەی هۆشبەری شیشە لە ئێران لەسەدا 25 ە و بە شێوەیەكی بەرفراوان لەحاڵی پەرەسەندتندایە و تا 10 ساڵی تر دەبێتە گەورەترین كێشە لەو وڵاتەدا.
ئەمەش لەحاڵێكدایە هەموو ئەو كەسانەی كە شیشە بەكاردەهێنن تەمەنیان كەمتر لە 30 ساڵە و بە وتەی ئەو كارناسە، لە ماوەی ساڵەكانی 81 تا 90 بەكارهێنانی مادەهۆشبەرەكان لە نێوان منداڵانی كەمتر لە 18 ساڵی ئێرانی دوو بەرابەر بووەتەوە.
شایانی باسە، لەسەدا 3ی گیرۆدەبووان بە مادەهۆشبەرەكان تەمەنیان لە نێوان 15 بۆ 19 ساڵ دایە. ئەمەش لەحاڵێكدایە كە پێشتر عەلیرەزا جەزینی جێگری بەرپرسی گشتی ستادی مادەهۆشبەرەكان رایگەیاندبوو كە، لەسەدا 4ی قوتابیانی ئێرانی مادەی هۆشبەرە بەكاردەهێنن.
