زاگرۆس پۆست
هێزە ئەمنیەتیەكانی كۆماری ئیسلامی لە پارێزگای كوردستان، چەمیرێك و چەند ئەندامی دیكەی داعشیان لە شاری سەقز دەستگیر كرد.
بە پێی راپۆرتی سەرچاوەكانی هەواڵ، كەسێك كە خۆی بە ئەمیری داعش ناساندووە، لە شاری سەقز لە لایەن هێزە ئەمنیەتیەكانی كۆماری ئیسلامیەوە دەستبەسەر كراوە و لەو پەیوەندەشدا چەند كەسی دیكە كە ژمارەیان ئاشكرا نەكراوە بە هۆی پڕوپاگەندە بۆ گرووپی تێرۆریستی داعش دەستگیر و رەوانەی زیندان كراون.
هەواڵەكان لەوبارەوە باس لەوە دەكەن، لە كاتی دەستگیر كردنی ئەو كەسانەدا رێژەیەكی بەرچاوی چەك و تەقەمەنیش دەستی بەسەردا گیراوە.
ئەمەش لەحاڵێكدایە، لە ماوەی رابردوودا لە هەموو شارەكانی رۆژهەڵاتی كوردستان لە زۆرێك لە شارەكانی ئێران بە مەبەستی پشتیوان لە خەڵكی خۆڕاگری كۆبانێ و دژایەتی لەگەڵ هێرشەكانی گرووپی تێرۆریستی داعش بۆ سەر خاك و خەڵكی كوردستان، چەندین كۆبوونەوەی بەرفراوان بەڕێوە چوو و كۆماری ئیسلامیش لەو پەیوەندەدا كۆمەڵێ لە چالاكانی كوردی دەستبەسەر كرد.
